EDITORYAL - Lisensyadong armas

Armas nga gigamit sa Grade 9 nga estudyanteng namusil sa sulod sa Banga National High School sa South Cotabato gipanag-iya sa iyang amahan ug kini lisensiyadong armas.

Ang amahan, kawani sad sa Department of Education isip Disaster Risk Mitigation officer sa maong departmento, matud pang Interior Secretary Jonvic Remulla.

Ang amahan dunay tulo ka lisensiyadong armas nga gisulod niya og usa ka sudlanan, apan giablihan kini sa maong bata ug maoy gigamit sa krimen.

Ikatulo na kini ka bayolenteng insidente nga naglambigit og mga lisensiyadong armas nga nikalas og mga kinabuhi sa mga tinun-an sa nasud karon lang tuiga.

Una didto sa Tacloban City, sunod ang sa Zamboanga City kansang mga armas nga gigamit dili lang lisensiyado, gipanag-iya pa gyud sa gobiyerno ug kaning nahitabo sa Banga nga pribadong armas apan lisensiyado.

Naay mga tawong walay mga lingaw o kulang lang gyud panghunahuna nga diretso dayung namasangil sa gobiyerno aning mga hitaboa.

Ang pamahayag ni Presidente Ferdinand Marcos Jr. nga kinahanglang dili mahimong kabahin na sa kinabuhi sa mga estudyante kaning mga bayolenteng insidente diha sa ilang mga eskuylahan.

Apan kinsa man gyud diay maoy angay basulon aning mga hitaboa? Ang gobiyerno ba gyud nga naghimo og mga regulasyon kabahin sa paghupot anang mga armas o ang mga tawong nagtinil niini?

Samtang tuod dili puydeng basulon ang tagiya sa mga armas kay di man sila maoy namusil, apan kinahanglan nga silay manubag niini tungod sa ilang pagpasagad.

Kanang hustong pagtip-ig ug paghipos sa armas nga dili makuha sa mga bata, usa kana ka dakong responsibilidad.

Ikaduha kanang pag-monitor kanunay sa dagan sa panghuna-huna sa mga bata diha sa ilang eskuylahan ug sa ilaha mismong panimalay, dako sad kaayo ng responsibilidad sa mga ginikanan ug sa mga magtutudlo.

Naa nay mga sugyot nga usbon ang kasamtangang mga balaod ug regulasyon sa pagtinil og armas, tingali kinahanglan kining paspasan.