Drayber nga nakaligis sa pedestrian gikasohan

CEBU, Philippines — Gipasakaan og kasong  reckless imprudence resulting in homicide ug abandonment of one’s own victim ang 22-anyos nga drayber nga giingong naka-hit-and-run nga nakapatay sa 42-anyos nga call center agent sa Cebu City.

Ang suspek nga giila sa alyas nga “Billy,” residente sa Barangay Guadalupe, Cebu City, gi-aresto sa mga sakop sa Traffic Enforcement Unit (TEU) sa Cebu City Police Office (CCPO) alas-10:41 sa buntag niadtong Septiyembre 14 sa Ayala, Barangay Luz.

Matud ni TEU-CCPO Chief Police Col. Jomar Medil nasang-at na nila ang kaso sa piskalya kagahapon, Septiyembre 15 batok kang Billy.

Ang kaso may kalabotan sa kamatayon ni Ralph John Vir Macalisang Salise, 42, nga giingong naigo sa Toyota Vios samtang mitabok siya sa pedestrian lane sa Governor M. Cuenco Avenue, Barangay Kasambagan, Cebu City, alas-3:30 sa kaadlawon niadtong Biyernes, Septiyembre 11.

Matud sa kapulisan, si Billy maoy nagmaneho sa Toyota Vios nga adunay plakang GBK 1475 ug naglumba uban sa Toyota Raize nga gimaneho ni Ralph Sisco Acol, 22, residente sa Barangay Lahug.

Gikan kuno sa usa ka establisemento sa 88th Avenue ang duha ka sakyanan ug padulong sa Talamban sa dihang nahitabo ang insidente.

Human maigo si Salise sa Vios, giingong wala motabang si Billy sa biktima ug misakay hinuon sa Toyota Raize uban sa iyang 17-anyos nga pasahero.

Mipadayon ang Toyota Raize sa pagikyas ug nabanggaan niini ang usa ka green taxi nga misulay sa pagpugong kanila ug mipadayun pag-ikyas hangtud sa Mandaue City.

Si Acol sa ulahi mibalik sa lugar sa insidente ug gi-aresto sa TEU kinsa napositibo sa alcohol breath analyzer.

Si Acol pasakaan sad og kasong reckless imprudence resulting in damage to property, obstruction of justice, paglapas sa Republic Act 10586 o Anti-Drunk and Drugged Driving Act of 2013, ug abandonment.

Matud sa kapulisan, adunay mga saksi ug CCTV footage nga nagsuporta sa ilang imbestigasyon, lakip ang mga nakasaksi sa pag-ikyas human sa pagbangga.

Girekomendar usab sa TEU ngadto sa Land Transportation Office Region 7 ang pagbawi sa mga lisensya sa duha  ug pag-alerto sa plate numbers sa duha ka sakyanan.— IBM BANAT NEWS