Sabotahe ni Sara
Kanus-a man mohunong si Bise Presidente Sara Duterte sa paghatag og mga ebidensiya nga magamit sa prosekusyon sa nagpadayon niyang impeachment trial sa Senado? Labing uwahi nga nakadani sa atensiyon sa mga sakop sa House panel of prosecutors mao ang pinatuyangan niyang mga biyahe sa nagkalainlaing kanasuran.
Human niinsistir si VP Sara nga iyang personal nga kuwarta ang gigamit sa pagbiyahe, nakuwenta sa mga kongresista nga ang kapin sa P8 milyones niyang gasto sa mga plite ug hotels sukad pa sa niaging tuig mas dako kay sa lehitimo niyang kita.
* * *
Tan-awon nato kon mopadayon bang mga laag ni VP Sara (nga walay klarong katin-awan unsay kapuslanan nga nahatag ngadto sa nasud ug sa katawhan). Human nipasidaan si Private Prosecutor Lorna Kapunan nga i-apil nila ang dagkong gastohan isip ebidensiya sa sunod nga article of impeachment nga magsentro na sa ill-gotten wealth.
Mas sayon ang pagkumbinser sa katawhan ug senator judges nga ilegal ang iyang katigayonan kon mapakita ang zero cash sa iyang statements of assets, liabilities and net worth ug alkanseng mga negosyo ug walay kita nga law office.
* * *
Iyang gisabotahe dili lang ang depensa impeachment trial kon dili hasta ang panagang sa iyang amahan sa International Criminal Court (ICC). Sa semana nga nangugat nga nagkinahanglan lang og P5,000 aron ipapatay ang kabit kon magbinuang ang iyang bana:
Gipresentar ang mga ebidensiya ngadto sa impeachment court sa iyang hulga pagpapatay sa presidente, first lady ug kanhi House speaker; ug
Nangandam ang prosecutors sa ICC sa dugang 6,909 ka ebidensiya sa extrajudicial killings ni kanhi Presidente Rodrigo Duterte.
* * *
Si VP Sara dunay giliwatan. Kabahin sa gitunol sa prosekusyon ngadto sa mga abogado ni Duterte mao ang dul-an sa 16 ka oras nga video ug audio files sa mga diskurso sa kanhi presidente nga nidasig sa kapolisan paglaktod og patay sa gidudahang mga durugista (aron dili makagasto ang gobyerno pagpakaon nila sa prisohan) ug pag-imbento og mga ebidensiya (butangan og armas bisan dili armado aron kapasanginlan nga nisukol).
Dili kublan sa balaod ang mga Duterte, sukwahi sa ilang gituohan. Nakalimot sa pasidaan sa katiguwangan. Nga ang labing idlas nga isda madakpan sa baba.
* * *
- Latest
