Bilib ko uy

Mora’g nangayabag na gyud ang mga tawo ron, apil ang mga batan-ong tinun-an, ug duna sa’y mga dagko na. Nagsige’g panghulga sa pagpamusil sa tunghaan.

Ang mga hamtong na nga nadakpan, pwerteng pagmahay kay nagtuo man sila nga dili madakpan.

Abtik kaayong gidakop sa kapolisan sa Bantayan, Cebu, ang tawo nga nagpadala og chat messages nga naghulga nga mohimo siya’g pagpamusil sa usa ka tunghaan sa lungsod kaniadtong Huwebes.

Unya didto sa Pinamungajan, Cebu, usa ka tinun-an nadakpan sab nga nagdala og .357 Magnum revolver!

Lain pa gyud tong gidakop kay nanghulga sab nga mohimo siya’g pagpamusil sa usa ka tunghaan sa Sanciangko Street, ug didto na kini madakpi sa Poro, Camotes.

Kining nadakpan sa Bantayan, usa ka 21-anyos nga lalaki ug gidakop siya kaniadtong Huwebes sa udto, kay abtik kaayo ang mga polis nga mihimo og follow-up.

Mihulga ang maong tawo nga adto siya mohimo og pagpamusil sa Bantayan National High School. Nadakpan siya mga alas 11:30 sa wa pay udto. Wala gipagawas sa kapolisan ang iyang ngalan kay nagpadayon pa ang ilang imbestigasyon.

Giawhag sa maong tawo ang mga tinun-an nga magbantay ug likayan ang eskwelahan. Abtik nga gisusi sa mga imbestigador ang mga mensahe, ug ang online account nga gigamit sa nagpadala.

Human nila makuha ang impormasyon, gilusad sa kapolisan ang hot-pursuit operation nga misangpot sa iyang pagkasikop. Daghang kaso ang iyang atubangon sa korte. Ang kapolisan miawhag sa mga estudyante, ginikanan, magtutudlo ug school personnel nga i-report dayon sa kapolisan ang bisan unsang hulga, o makapahadlok nga mensahe.

Ang dinakpan gitanggong pa ug giandaman og kaso.

Kadtong sa Pinamungajan, nasakmitan og .357 Smith & Wesson Magnum revolver ang usa ka 14-anyos nga tinun-an sa Lut-od National High School, sa Barangay Lut-od, Pinamungajan.

Gipakalitan sa magtutudlo ang pag-inspection sa mga bag sa mga tinun-an ug didto na nasakpan nga usa sa iyang mga estudyante naghupor diay og 357 Magnum revolver.

Sa imbestigasyon, ang tinun-an miingon nga ang armas gipanag-iya sa iyang apohan ug gitagoan kini sa ilang aparador, ug hilom niyang gikuha.

Wa pa mahibaw-i kon ang maong armas lisensyado ba kay ang apohan sa bata nagtrabaho man sa gawas sa nasud.

Ang bata gitugyan sa Municipal Social Welfare and Development (MSWD) Office, apan ang balaod naglatid nga ang nag-edad og ubos sa 15-anyos dili mapasakaan og kaso. Kadtong nadakpan didto sa Camotes, milayas siya didto kay nasayran niyang giimbestigar na sa kapolisan ang paghulga niya nga mamusil siya sa tunghaan diha sa Sanciangko.

Pwerte niyang pagmahay, ug ang kabugal-bugalon ra gyud kuno niya ang rason nga mihimo siya sa maong kabuang. Halos tibook nasud na kining maong problema, human sa nahitabong pagpamusil sa usa ka tunghaan sa Leyte.