Gidunggab sa gipamabdosan

CEBU, Philippines — Gidakop sa kapolisan ang usa ka babayeng 23-anyos nga engineering student human giingong gidunggab ang iyang 26-anyos nga ex-boyfriend atol sa panaglalis human dili angkonon sa biktima ang iyang gisabak.

Ang suspek lumad nga taga-Iligan City samtang ang biktima mao ang iyang 26-anyos nga ex-boyfriend nga gidala sa tambalanan tungod sa samad dinunggaban.

Base sa inisyal nga kasayuran, miari sa Sugbo ang babaye gikan pa sa Iligan City aron makigkita sa biktima aron pahibaw-on nga namabdso siya human sa ilang gitawag nga “closure lovemaking” sa wala pa sila hingpit nga nagbuwag niadtong nilabay’ng buwan.

Apan imbes nga manubag ang biktima sa responsibilidad giingong dili kini modawat kay dili niya anak ang gisabak sa babaye.

Sa ilang gi-check-inang Air Bed and Breakfast (Airbnb), gusto unta sa babaye nga kuyogan siya sa lalaki bisan usa lang ka gabii tungod sa iyang pagbuntis.

Apan mipugos ang lalaki nga mouli hinungdan sa kasuko sa babaye tungod usab sa iyang pagduda nga aduna na kini laing hinigugma.

Matud sa report, gibabagan sa suspek ang biktima diha sa pultahan aron dili makagawas hangtod nisangpot na sa pisikal kining nanakit, ug tungod sa kalagot sa babaye naduslakan niya og kutsilyo sa lalaki. Wala daw niya tuyoa nga dunggabon ang biktima.

Pagresponde sa mga tanod ug kapulisan sa Abellana Police Station, nadakpan dayon  ang babaye samtang gidala sa tambalanan ang lalaki.

Gihikay na ang tukmang kaso batok sa 23-anyos nga suspek.—  IBM BANAT NEWS