Pag-waive multa, lisud buhaton

CEBU, Philippines — Maglisod si Cebu City Mayor Nestor Archival sa pag-waive sa multa sa mga nakalapas sa inisyal nga pagpatuman sa Oplan Bantal: Discipline Zone tungod kay ang gipang-isyu nga citation tickets kabahin sa Commission on Audit auditable documents ug nakabase ang istrikto nga pagpatuman sa City Ordinance 801 o ang Cebu City Traffic Code.

Kini ang tubag ni Kenneth Siasar kinsa chief of staff ni Archival kabahin sa hangyo ni Konsehal Harold Kendrick Go kung aduna ba’y posibilidad alang sa one-time nga pagtangtang o pag-waive una sa mga kalapasan nga nahimo atol sa pasiunang implementasyon sa Oplan BanTal tungod kay daghang mga motorista ug mga pasahero ang gipamulta tungod sa kalibog sa bag-ong patakaran atol sa adjustment period.

“Ang gi-issue nato nga form, COA form to siya. Kun naay ordinansa nga obligado sila nga mohatag og bayad, maglisod og waive ang Mayor kun part na sa COA-able nga dokumento,” matud ni Siasar.

Ang Oplan BanTal gipatuman sa Cebu City Transportation Office ubos sa mando ni Archival aron mas mahapsay ang dagan sa trapiko, ilabi na sa paggamit sa mga designated lane alang sa mga motorsiklo.

Apan imbes tutukan ang pagsilot ug pagpamulta sa mga nakalapas, gihangyo ni Siasar ang mga motorista nga mas hatagan og pagtagad ang tumong sa bag-ong sistema sa trapiko tungod kay ang BanTal corridor  giisip nga pinakahuot nga dalan sa syudad ug gikinahanglan na sa mayor nga mopatuman og bag-ong patakaran aron nga moluag ang kahuot sa dagan sa trapiko.

Gihimug-atan sab ni Siasar nga tumong ra gyud sa mayor nga magbaton og disiplina ang tanang motorista aron nga malikayan ang disgrasya sa kadalanan. 

Gisaysay ni Siasar nga kadaghanan sa mga kalapasan nga natala naglambigit sa counter-flowing ug mga motoristang molabang sa solidong linya. Ang pagpatuman sa experimental traffic scheme sa BanTal gisugdan niadtong Agosto 5, 2026. — IBM BANAT NEWS