Panglaktod ni Sara
Nga nakalahutay si Bise Presidente Sara Duterte sa mga atake sa administrasyon ni Presidente Ferdinand Marcos Jr. posibleng timaan sa iyang kalig-on. O kapating. Lisod nang daan ang pagpanagang sa mga pagsaway, labi na kon dunay mga sukaranan. Mas bug-at pa gyod nga ang gipasangil nga mga krimen maoy sentro sa kada husay sa Senate impeachment court nga makit-an sa bisan asang suok sa kalibotan.
Mao nga dili mabasol si VP Sara nga nisuway og mas laktod nga pagtapos sa proseso. Aron dili mabisto ang mga ebidensiya nga iyang gikahadlokan.
* * *
Nilampos siya sa pagpalaban sa niaging tuig sa Korte Suprema. Nga nibasura sa articles of impeachment batok niya tungod sa technicalities. Pero napakyas karong tuiga sa pagtago na sab unta sa mga kapa sa mga mahistrado. Nga ang mayoriya tinudlo sa iyang amahan nga si kanhi Presidente Rodrigo Duterte.
Maong nidangop siya og laing panglaktod. Nikatap sa niaging semana ang mga taho, nga mas nisibaw kay wala ipanghimakak sa Malakanyang gahapon, nga sekreto siyang makigtagbo ni Marcos Jr. pagtuki sa posible niyang resignasyon bugti sa pagbawi sa mga kaso.
* * *
Gawas sa pagkabanhaw sa tanang mga detalye sa nabisto nang kalapasan sa mga lagda, nga lisod kaayong lubagon bisan sa labing lunod patay niyang mga dumadapig, mas nahasol si VP Sara sa mas baho niyang mga sekreto nga wala pa sukad masukad mabisto.
Sama sa pag-abli na sa bank accounts niya ug sa iyang amahan. Unsaon man niya pagpasabot kon tinuod nga dunay binilyon ka pesos nga wala itug-an sa iyang statement of assets, liabilities and net worth (SALNs)?
* * *
Kon modiretso siya og resign dako ang risgo nga makumbinser sa House panel of prosecutors ang mayoriya sa senator judges (nga dili niya mga alyado) nga ipadayon ang impeachment trial aron mapahamtang ang laing silot, ang perpetual disqualification from holding public office, nga modili niya pagdagan pagka presidente.
Maong pahimuslan ang kaandam sa presidente sa pagpaminaw sa iyang tanyag: Patiwason si Marcos Jr. sa iyang termino ug itugyan sa mga botante kinsay ilang pilion sa 2028. Ambot unsaon pagkumbinser ang mga Marcos nga kon makabalik ang mga Duterte sa Malakanyang magpabiling buhi ang ilang mga kaatbang.
* * *
- Latest
