Suliran ang sulbad sa suliran

Problemado ang katawhan sa kakuwang sa tubig mainom o domestic water. Bisan asa nga dapit sa nasud problema ang kakuwang sa supply sa tubig. Bisan ang Angat Dam hapit na mahubas ug ang pagsige og uwan wala gihapon makapabalik sa igong gidaghanon sa tubig nga mapundo sa Anggat dam.

Dinhi sa dakbayan sa Sugbo mangadlawon ang mga tawo sa pagpaabot sa agas sa tubig sa Metro Cebu Water District (MCWD) ug uban nga water distributor.

Kun problema ang supply sa tubig, problema usab ang pagsige og lunop ug pagbaha bisan asa nga dapit sa nasud. Gani ang nasinati nga paglunop ug pagbaha mao kini ang hinungdan kun nganong migahin og trilyones nga salapi ang nasudnong kagamhanan alang sa flood control nga proyekto nga miresulta usab ngadto sa iskandalo tungod sa pagkapunta sa budget niini ngadto sa bulsa sa mga opisyal sa gobyerno ug sa nagpadayong mga paglunop ug pagbaha.

Dinhi sa Sugbo gibaha ug gilunopan ang Metro Cebu. Tungod sa kakusog sa tubig nga nagbaha daghang propiedad ang nangadaut.

Sa kinatibokan, magamay o madaghan, problema ang tubig. Apan ang problema poyde rapod nga sulbaron sa problema.

Nakahinumdom ko sa sulti ni Presidente Bongbong Marcos Jr. diin gikataw-an siya sa mga tawo dihang iyang giingon nga tigumon ang tubig nga nagbaha aron magamit sa panahon sa ting-init. Mas maayong seryosohon sa Presidente ang misantop sa iyang hunahuna pinaagi sa paglakip sa budget alang sa water catchment project.

Ang water catchment project mao ang sulbad sa suliran sa kakuwang sa supply sa tubig ug suliran sa lunop ug mga pagbaha.

Suliran ang sulbad sa suliran.