Gawasnon na’s Bong

Nakagawas na sa prisohan si kanhi Senador Bong Revilla Jr. kay gitugotan siya sa Sandiganbayan nga makapiyansa og P1 million sa iyang kaso nga malversation of funds kalabot sa ghost flood control project.

Gipasanginlan si Revilla nga nakadawat og kickbacks gikan sa?92.8 million nga ghost flood control project didto sa lungsod sa Pandi, Bulacan nga matud sa DPWH nahuman na, apan wa diay kini trabahoa.

Ang kaso nga gipasaka sa Ombudsman batok kang Revilla dili basta-basta nga mapiyansahan, gawas lang kon masuta sa huwes nga huyang ra ang mga ebidensya batok sa akusado.

Atol sa hearing sa petition for bail nga gisumiter sa mga abogado ni Revilla, ang Ombudsman nga maoy nagsilbing prosecutor sa kaso giingong napakyas pagmatuod nga lig-on ang ilang kaso batok sa kanhi senador.

Si Revilla boluntaryo nga nagpabilanggo human nga ang Sandiganbayan miisyu og warrant of arrest batok kaniya kay matud sa kanhi senador nga gusto niyang pamatud-an nga wa siya’y sala.

Duha ka sakop sa Sandiganbayan Third division nga sila si Associate Justices Fritz Bryn Anthony delos Santos ug Ronald Moreno miuyon nga si Revilla tugotan nga makapiyansa.

Mao nga ang chairman sa Third Division nga si Associate Justice Karl Miranda nalupig, kay usa ra man siya kontra sa duha niya ka kauban nga pabor nga papiyansahon si Revilla.

Bisan og wa siya’y labot, apan si kanhi DILG Secretary Rafael Alunan miingon nga natan-aw niyang sayop sila si Delos Santos ug Moreno sa pagtan-aw nga huyang ang kaso batok ni Revilla.

Abtik kaayo si Revilla nga mibayad og piyansa nga P1 million, hinungdan nga nakagawas na siya sa bilanggoan kaniadtong Hulyo 31, 2026.

Ang rason sa duha ka justices nagkanayon nga ang kuwarta kuno nga giingong nadawat ni Revilla, nga giingong kickbacks, nadawat niini gikan sa kontraktors sa wa pa sugdi ang proyekto.

Mao nga matud ni Alunan nga ang kuwarta nga gihisgotan dili pa maisip nga public funds, nga magamit pagpasaka og malversation of public documents batok sa kanhi senador.

Wa man sab gyud kuno manghilabot si Revilla sa pagpahigayon sa proyekto. Ang mga legal experts nga nakabasa sa dissenting opinion ni Justice Karl Miranda mitan-aw nga duna kini lig-on nga basehanan.

Na hala, awhagon nako ang mga batid sa balaod nga hatagi ninyo og ediya ang atong mga graft investigators sa Ombudsman aron magamit nila sa paghimo og lakang.

Nindot kini ipaabot sa Korte Suprema ang maong isyu aron nga kon dunay paborable nga hukom, maapil kini sa mga jurisprudence nga kabasehan nato sa umaabot nga mga kaso.