Gikinahanglan mosagop sa kabag-ohan

Unsa man ka mahinungdanon ang “My SSS Card” alang sa mga miyembro sa Social Security System (SSS)? Gikinahanglan ba gyud nga mokuha ani bisan og naa nay karaang SSS ID o UMID ID?

Kini ang kasagaran nga pangutana sa mga miyembro karon taliwala sa panawagan sa ahensya nga magkuha na sa maong kard. Bag-o lang ako nga nagproseso niini ug nakahinabi mismo ang mga opisyal sa SSS, labi na si Eric Coronado, ang pangulo sa SSS Visayas One Central Division sa Cebu, diin nahatagan og katin-awan ang atong mga pangutana.

Kining My SSS Card mao na ang pinakabag-o nga gi-require sa ahensya kay dual purpose kini—magsilbi kini isip opisyal nga SSS ID ug sa samang higayon, usa usab ka ATM card. Dinhi na isulod sa SSS ang tanang monetary transactions sama sa loans, benepisyo, ug ang pension sa mga retirees.

Giklaro hinuon sa SSS nga magamit pa man ang karaang SSS ID ug ang UMID, apan isip pagpaila o ID na lamang ug dili na mahimong plastada sa pagdawat og kwarta.

Unsaon na man lang kon mag-loan ang miyembro? Sa pagkakaron, ang gigamit mao ang Disbursement Account Enrollment Module o DAEM, diin nakakonektar sa gipiling bangko o e-wallet sa miyembro kay didto ipaagi ang kwarta. Apan moabot ang panahon nga wagtangon na kining DAEM, busa gikinahanglan gyud nga mokuha sa My SSS Card.

Murag hasol ang proseso alang niadtong dili kaayo maayo sa teknolohiya, ilabi na ang atong mga senior citizens ug ang mga aksiyon nga nakagisnan na ang tradisyonal nga pamaagi—ang personal nga pag-adto sa buhatan sa SSS. Masabtan nato sila, apan wala na gyud tay mahimo kon dili ang mosagop sa kabag-ohan. Mamahimong magpatabang sa mga apo, anak, o mga kaila nga nakasabot kon unsaon pag-avail niini tungod kay anaa na man sa online ang tanan.

Diha sa SSS Portal, dali ra kaayo ang paghimo og My SSS account basta siguraduhon lang nga sakto ang username ug password ug sundon ang mga direksyon. Apan angayan nga hinumduman sa mga miyembro nga kinahanglan magkuha daan og National ID gikan sa Philippine Statistics Authority (PSA). Bisan wala pa ma-release ang pisikal nga kard, basta rehistrado na kay puyde na kana i-link sa SSS Portal.

Kon naa ka nay SSS account, puwede na ka magproseso sa My SSS Card. Pangitaon lang ang services tab sa imong account ug sundon ang instruksyon. Aron maproseso kini, mag-download daan og RCBC DiskarTech app sa imong smartphone (Android man o Apple). Ang RCBC ang usa sa mga partner banks sa SSS. Pagkahuman sa aplikasyon, mobayad lang og ?200 alang sa ATM / My SSS Card, ug maghulat og 2 to 3 weeks aron makuha ang card.

kining gihisgotan tungod kay sa dawaton man ug sa dili, wala na kitay mahimo kon dili ang pagdawat sa modernong pamaagi. Ug kon maanad na ta, mas sayon na ra man diay ang tanan—kon mag-loan ka, pinaagi na lang sa cellphone ug diha ra usab ka magpaabot nga ma-release ang imong claims. Dili na ka mag-gasto og dako nga panahon ug plete sa pag-adto sa ilang buhatan tungod kay anaa na sa imong palad ang tanan. Sa usa ka tulpok lang, makuha mo na ang imong gikinahanglan.

Tungod niini, samtang sayo pa, magkuha na ta og My SSS Card aron mahimong sayon, hapsay, ug paspas ang tanan.