Economic Sabotage

Magandang balita. Apat na indibidwal ang nahatulan ng Manila Regional Trial Court kaugnay ng dalawang magkahiwalay na kaso ng smuggling ng sigarilyo at mga sasakyan na nangyari noong 2021.

Sa unang kaso, isang indibidwal ang napatunayang gumamit sa YJC International Corporation bilang consignee-for-hire upang maipasok sa bansa ang dalawang 40-foot container mula sa China. Idineklara ang kargamento bilang mga produktong plastik, ngunit nang siyasatin ng Bureau of Customs (BOC), tumambad ang totoong laman 1,599 karton ng mga sigarilyong itinago sa gitna ng mga idineklarang produkto at walang kaukulang import clearance.

Dahil dito, hinatulan siya ng korte ng pagkakakulong ng mula 12 taon at isang araw hanggang 15 taon at isang araw sa bawat bilang ng paglabag.

Sa ikalawang kaso naman, nahatulan ang presidente, bise presidente, at corporate secretary ng ADNFinest Marketing Corporation matapos mapatunayang sangkot sa ilegal na pag-aangkat ng mga sasakyan mula sa Dubai, United Arab Emirates. Dalawang sasakyan lamang ang idineklara sa dokumento, ngunit sa inspeksiyon ng Customs ay natuklasan ang hindi idineklarang 2020 Chevrolet Camaro ZL1 at 98 pirasong gamit na gulong. Lumabas din sa paglilitis na wala silang Certificate of Authority upang mag-import ng mga sasakyan.

Bawat isa sa tatlong opisyal ng kumpanya ay hinatulan ng pagkakakulong ng mula anim na taon at isang araw hanggang sampung taon at isang araw.

Ayon sa Bureau of Customs, agad silang nagsampa ng kasong kriminal noong 2021, sa mismong taon na naganap ang mga ilegal na importasyon. Ipinakikita nito ang mabilis na pagtugon ng ahensiya laban sa mga lumalabag sa batas sa adwana.

Sinabi rin ni BOC Commissioner Ariel Nepomuceno na malinaw ang mensahe ng mga kasong ito: may kapalit ang paglabag sa batas. Hindi lamang nila hinaharang ang mga ilegal na kargamento sa mga pantalan, kundi tinitiyak din nilang napapanagot ang mga nasa likod ng mga ito upang maprotektahan ang mga lehitimong negosyo at mapanatili ang patas na kalakalan sa bansa.

Ngunit para sa maraming Pilipino, tila kulang pa ang ganitong parusa.

Ang smuggling ay hindi simpleng paglabag sa customs law. Isa itong direktang pag-atake sa ekonomiya ng bansa. Bawat container ng kontrabando ay katumbas ng milyun-milyong pisong buwis na hindi nakokolekta—pondong sana’y napunta sa edukasyon, ospital, imprastraktura at iba pang serbisyong kailangan ng mamamayan.

Mas masahol pa rito, pinapatay ng smuggling ang kabuhayan ng mga negosyanteng sumusunod sa batas. Paano makikipagsabayan ang lehitimong importer kung ang kalaban niya ay hindi nagbabayad ng tamang buwis at gumagamit pa ng panlilinlang upang makalusot?

Kaya panahon nang higpitan pa ang laban. Hindi dapat hanggang sa mga runner o frontman lang ang inaaresto. Dapat ding habulin ang mga financier, utak ng operasyon, protector, at lahat ng nakikinabang sa smuggling. Kung walang kapital at walang proteksiyon, walang sindikatong mabubuhay.

Marami ang naniniwalang dapat nang ikonsidera ang malawakang smuggling bilang economic sabotage kapag napakalaki ng pinsalang idinudulot nito sa ekonomiya. Ang ganitong uri ng krimen ay hindi lang paglabag sa batas ito ay tahasang pagsasabotahe sa kabuhayan ng sambayanan. Kung mapatutunayang may sapat na batayan sa umiiral na batas o sa mga susunod na reporma, nararapat lamang na ang mga pangunahing smugglers at kanilang mga financier ay maharap sa pinakamabigat na kasong maaari, kabilang ang mga kasong may kaugnayan sa economic sabotage.

Hindi sapat na may makulong paminsan-minsan. Ang tunay na tagumpay ay kapag tuluyang nabuwag ang buong sindikato, nakumpiska ang kanilang mga yaman, at wala nang sinumang maglalakas-loob na gawing negosyo ang pagnanakaw sa kaban ng bayan.

Disclaimer: Ang artikulong ito ay batay sa impormasyong inilabas ng Bureau of Customs tungkol sa mga kasong napagdesisyunan ng hukuman. Ang mga pahayag na nananawagan ng mas mabigat na pananagutan, kabilang ang mungka­hing pagharap sa mga kasong may kaugnayan sa economic sabotage kung may sapat na batayan sa batas, ay opinyon ng may-akda at hindi paglalahad ng umiiral na hatol o karagdagang kasong naisampa.