Women LTO agents

Babaye ang gitudlo ni LTO-7 regional director Wendell Dinglasan nga maoy mangulo sa Law Enforcement Section sa LTO ug nanguha sab kini og mga babayeng sakop nga aktibong manakop sa masalaypong driver.

Tan-aw nako nindot kining gihimo ni Dinglasan kay ang mga babayeng sakop sa LTO mora’g lisud masubornohan, ilabi na nga nasayod na sila nga gikuha sila aron ibalik ang maayong rekord sa LTO kaniadto.

Ako isip kanhi deputized agent sa LTO sulod sa tulo ka tuig kapin, nakabantay gyud og mga kahiwian. Sama nga kon manakop ko kaniadto og mga cargo truck, dunay mobadlong nga ipahinay-hinay lang ang pagpanakop.

Nasayran nako nga ang mga operators diay og cargo truck kaniadto gihimong pangayoanan og bisan unsa kon dunay mga opisyal sa LTO, ug Department of Transportation (DOTr) nga manganhi sa Sugbo.

Kana maoy angay’ng bantayan sa mga opisyal, kay kon moanhi mo unya magpagasto mo sa inyong mga sakop dinhi, natural nga mangita kana sila og maka-sponsor sa ilang gastohan.

Resulta, kon ang maong mga operators og cargo truck makahimo og salaod nga supak sa mga lagda sa Transportation and Traffic Code, dili makadulot ang ngipon sa LTO. Di ba tinuod?

Bahin niining mga babayeng LTO agents nga mosalmot sa pagpanakop sa mga driver, nindot kaayo ni kay ang mga babayeng agents, basta magtinarong lang, karespitohan man.

Busa, padayona kana Director Dinglasan sir! Ang ubang drivers nga nadakpan, wa ra sab moreklamo kay gwapa kuno ang LTO agent nga midakop kanila.

* * *

Gisunog sa PDEA ang kantidad og P676.6 million nga shabu nga ilang nasakmit dinhi sa Central Visayas, aron nga way pagduda nga gamiton kini nga ibaligya ra pagbalik ngadto sa mga adik.

Ang pagsunog sa maong mga shabu gipaagi sa pagsunog niini sama sa pag-cremate og lawas sa tawo, ug diha kini himoa sa usa ka punerarya sa Junquera Street, Cebu City.

Pero, mas nindot gyud unta nga dunay aktwal nga pag-testing pinaagi sa pagkuha og kabahin sa mga shabu nga sunogon, unya himoan og laboratory test kon tinuod pa ba nga shabu ang sunogon sa PDEA.

* * *

Good news kon matuman ni Presidente Bongbong Marcos nga tangtangon na ang bayranan sa systems loss diha sa bill nato sa kuryente.

Apan magkinahanglan pa kini nga amendahan ang Epira Law (Electric Power Industry Reform Act) aron wad-on na ang "systems loss" sa mga power distributors nga ipasa nila sa mga power consumers.

Ang systems loss mao ang alkanse sa mga power distributors sa mapalit nilang kuryente gikan sa mga power producers. Apil niini ang mga kuryente nga gikawat sa mga kawatan og kuryente.