Kon gusto man gyud gani sa mga opisyal sa Cebu City nga mamenus-menosan ang problema sa trapiko dinhi sa siyudad, kinahanglang wad-on na ang parking slots diha sa mga gagmay’ng karsada.
Duna man gu’y mga gagmay ra nga karsada nga ang masi’g ka daplin gibutangan og parking slots nga anha mamarking ang mga sakyanan, unya ang mga tag-iya kolektahan og bayad.
Unsa may epekto niini nga ang left and right nga bahin sa karsada gipaparkingan og mga sakyanan? Tan-awa kon unsay sitwasyon sa Manalili Street gikan sa eskina D. Jakosalem paingon na sa Carbon market.
Sigurado ko nga bisan og ibilin lang usa ang one-side parking sa karsada, unya estriktohon ang pagpanakop kon dunay moparking sa pikas nga bahin sa karsada, dili ba maibanan og gamay ang problema sa trapiko. Unsaon man sab gud nga ang mga sakop sa Cebu City Traffic Board dili man modiskutir niini nga mga isyu, sige man lang og diskuter nianang mga road closure tungod kay ang karsada gamiton sa disco ug uban pa. Mao ni nga gihulagway nako usik lang sa oras ang pagtambong sa miting sa Traffic Board nga road closure ra maoy gituki nga isyu. Aw, dunay pipila nga maayong isyu nga mahisgotan, apan panagsa ra gyud.
Hinuktuki ninyo kon dili ba maayo ang akong gisugyot. Mag-unsa man nga ang siyudad makakuwarta og P8 million sa usa ka tuig nga bahin sa kita gikan sa koleksyon sa Tokagawa/CEPMA, unya grabeng problema sa trapiko ang atong nasinati.
Sabta ra gud ninyo, ilabi na ikaw Mayor Nestor Archival, ang opinyon sa Commission on Audit (COA) nga Joint Venture Project sa siyudad ug sa Tokagawa nga sila ang mangolekta sa parking fees, “disadvantageous” sa kagamhanan sa siyudad.
Tabla ra gyud na nga ang Tokagawa/CEPMA gihatagan ninyo og higayon nga makahimo og negosyo dinhi sa siyudad gamit ang mga karsada nga gipaparkingan og sakyanan, unya ang makolektang parking fee, 22 percent ra sa siyudad ug ang 78 percent ila sa Tokagawa.
Ang 22 percent nga para unta sa Cebu City government, ibanan pa gyud og Value Added Tax (VAT), sa ato pa pwerte na lang gyud nga gamaya sa mahipunta sa siyudad.
Utokan man gyud ni si Mayor Archival kay enhenyero ka man, hinuktuki mayor, kay basin og i-renew na sab nimo ang kontrata sa Tokagawa nga mapupos karong 2027. Kon ibanan ang mga pay parking slots sa mga karsada, sigurado ko nga makatabang ni sa pagpahapsay og gamay sa problema sa trapiko. Sayonan ka nga hasta ang Pelaez Street kilid sa USC nga gamay’ng karsada, double side parking?