10 ka NBA teams gikonsidera sa kampo ni LeBron

CEBU, Philippines —  Si Rich Paul, ang ahente ni NBA superstar LeBron James, nagkanayon nga ang 41-anyos niyang kliyente adunay 10 ka destinasyon nga pagpapilian sunod season human kini mibiya sa Los Angeles Lakers.

Ang NBA all-time leading scorer ug four-time champion mipahibawo ning bag-ohay pa lamang nga dili na siya mobalik sa Lakers ug mangita siya og laing team sa free agency alang sa ika-24 niyang season.

Mitug-an si Paul nga nakadawat na siya og daghang mga tawag gikan sa mga NBA teams nga buot mokuha ni James, kansang abilidad way pagbahar ug nagpibiling hait bisan pa sa iyang pang-edaron.

"These calls I'm getting are a true testament to how you have respect in this game," matud pa ni Paul ngadto ni James sa labing uwahing edisyon sa iyang "Game Over" podcast nga gipagawas kagahapong adlawa.

Sa kaugalingon niyang panglantaw, haum si James sa pipila ka teams apil na ang Golden State Warriors, Philadelphia 76ers, Denver Nuggets, Cleveland Cavaliers, Miami Heat ug Minnesota Timberwolves.

Gihisgutan sab ni Paul ang Dallas Mavericks, Boston Celtics, San Antonio Spurs ug New York Knicks.

Si Paul mipadayag nga kon wala pa makampiyon ang Knicks sa miaging bulan, sa New York unta motapon si James.

Samtang milig-on ang tsansa sa Philadelphia nga makubit si James human nalabni sa Sixers si Jaylen Brown gikan sa Celtics.

Ang pagdugang ni James sa usa ka starting lineup nga naglangkob nilang Brown, Joel Embiid, Tyrese Maxey, ug VJ Edgecombe way lalis nga usa ka lig-ong puwersa.

Si Paul naglantaw sab sa Heat, nga mibira ni Giannis Antetokounmpo aron ikatumpang nilang Bam Adebayo, Davion Mitchell ug Andrew Wiggins.

Giapil sab ni Paul ang San Antonio, Boston, ug Golden State bisan og nangiwit kini sa iyang listahan. (CEBU NEWS)