Unsay kridibilidad sa INC?

Katungod ni bisan kinsa ang pagpadayag sa iyang huna-huna ug baruganan sa mga isyu nga may labot ang nasud. Bisan ang pagsalmot sa malinawon nga lihok protesta katungod sa matag-Pilipino nga gigarantiyahan sa Batakang Balaod ubos sa landong sa demokrasya.

Way dautan niini, apan ang problema giabusohan sa kadaghanan alang sa ilang personal nga interest ug aron pagpakita sa ilang gahom ug impluwensiya. Moa ni ang nahitabo sa kinalit nga lihok protesta sa Iglesia ni Cristo didto sa kaulohan sukad niadtong Martes.

Bisan way permit ug nakahasol sa daghang motorista gipasagdan sa mga awtoridad nga magtigom ang mga sakop sa INC didto sa Edsa People Power Monument tungod lagi kay demokrasya man ug katungod sa matag-Pilipino ang pagpadayag.

Pero atong susihon unsa ba gyud ka lihitimo ang ilang kawsa batok sa gobiyerno? Ang mga lider sa INC ug pipila sa mga politiko nga misuporta sa ilang kalihokan nanawagan sa gobiyerno nga patubagon ang mga kurakot nga mga opisyal ug hunongon ang ilang gihulagway nga “selective justice” nga maoy gipatuman sa administrasyon ni Presidente Bongbong Marcos Jr.

Ilang pasabot sa “selective justice” mao ang pagpanggukod kuno sa mga kontra niini sa politika samtang giprotehian ang ilang mga kaalyado. Husto, dili makiangayon nga pilion lang sa gobiyerno ang ilang gukdon. Angayang ang tanang nalambigit sa pangurakot sa pundo sa gobyerno manubag ug mapasakaan og kaso.

Ug apil sa mga opisyal nga angayang manubag husgado mao ang ilang miyembro nga si Senador Rodante Marcoleta. Apan nganong mag-rally man ang INC aron protehian si Marcoleta? Nganong di man nila pasagdan nga ang sistema sa hustisya maoy mopatigbabaw ug depensahan ni Marcoleta ang iyang kaugalingon didto sa korte?

Klaro nga ang tuyo sa INC aron i-pressure ang kagamhanan nga dili ihinayon ang pagpasaka og kasong plunder batok ni Marcoleta. Kini tungod kay ang protesta gihimo human gipahibawo sa Ombudsman nga giandam na nila ang kaso batok ni Marcoleta tungod sa pag-angkon niini nga midawat og P75 milyones nga donasyon alang sa iyang kampanya pagkasenador. Ang donasyon iyang gidawat samtang siya sakop sa Kongreso isip partylist representative.

Ang problema sa INC ug sa ilang kawsa mao ang kakuwang nila og kridibilidad nga mohimo og panawagan batok sa korapsiyon.

Numero uno, dili ba diay maisip nga korapsiyon ang gihimo ni Marcoleta? Ikaduha, dili ba ang INC man ang numero nga supporter ni Marcos, nga ilang gipasanginlang kurakot, sa miaging eleksiyon?

Ikatulo, daghan sa mga politiko nga dunay kaso sa pangurakot ang  ilang giindorso unya karon magprotesta sila batok sa korapsiyon? Lakip sa ilang mga giindorso silang Bong Revilla ug Jinggoy Estrada nga karon pulos nangapriso tungod sa kasong plunder. Busa unsa may kridibilidad sa INC?