Huwaw

Apektado na ang mga tinubdan sa tubig nunot sa grabe nga kainit sa panahon.

Ang Metro Cebu Water District (MCWD) nipasidaan na sa pagkunhod sa ilang produksiyon sa tubig nunot sa epekto sa huwaw.

Ang naandang gidaghanon sa ilang produksiyon mas niminus tungod kay apektado ang ilang mga tinubdan hinungdan nga ilang awhag sa mga kunsimidor nga mosabot sa sitwasyon ug magdaginot sa tubig.

Apan ang labing apektado mao ang mga mag-uuma sa kabukiran nga nagsalig sa mga sapa ug tubod aron dunay tubig nga magamit alang sa ilang mga pananom.

Ang problema sa kakuwang sa tubig sa mga mag-uuma hapit matag-tuig nila nga masinati apan way kausaban sa pagpangandam sa City Agriculture Department (CAD) pagsulbad sa problema.

Inay mangita og mas malungtaron nga solusyon sa problema pinaagi sa pagpangita og tinubdan nga mahimong i-develop, pagpamalit og drum ug hose ray kanunay nilang tubag sa problema.

Tinuod nga nagkinahanglan ang mga mag-uuma og drum aron kapundohan og tubig ingon man hose aron magamit sa paghakot sa tubig gikan sa tinubdan apan makalibog nganong matag-tuig man gyud mopalit ang CAD niini.

Disposable ba ang mga drum ug hose nga ilang gipamalit ug gipanghatag sa mga mag-uuma nga kinahanglang kada tuig gyud mag-ilis?

Dili ba ni usik-usik sa pundo sa gobyerno nga kada tuig gyud mopalit og hose ug drums?

Imposible man sab tingali nga ang mga drum ug hose nga gipanghatag sa miaging tuig naguba na.

Gawas lang og dunay opisyal sa CAD o ba kaha sa syudad nga namaligya og hose ug drums nga gustong magnegosyo.

Maayo tingali nga sa dili pa mamalit og bag-ong hose ug drums ang CAD mohimo una sila og imbentaryo sa mga gipanghatag nila sa miaging tuig.

Ug mas maayo nga konsultahon una nila ang mga apektadong mga mag-uuma og unsa gyuy ilang gikinahanglan sa dili pa magpatuyang og pamalit.

Kay unsa may kapuslanan sa drum ug hose kun walay tinubdan sa tubig nga mahimong kakuhaan sa ilang supply.

Laing hinanggaw nga tubag sa CAD sa epekto sa huwaw mao ang pagpanghatag og binhi. Unsaon man na ang binhi nga naglisod gani og supply sa tubig?

Unsaon man na pagtanom sa mga mag-uuma nga nangliki man ang yuta tungod sa kainit?

Mao ni nakadaot og dili maghuna-huna ang mga ahensiya sa gobyerno sa ilang trabaho.

Basta lang aron ingnon nga dunay gibuhat bisan wala magkadimao.