EDITORYAL - Hadlok sa hospital bills

Dunay higayon sa kinabuhi sa usa ka tawo nga masakit ug gikinahanglan silang maospital. Samtang importante kaayo nga himsog pirme ang tawo, naay mga panghitabo nga dili kalikayan ug kinahanglang madala sa tambalanan.

Apan subo lang nga dili tanang mga Pinoy nga nagkasakit nga bisag kinahanglang dad-on sa tambalanan, ang nagpa-ospital gyud tungod sa kabalaka sa hospital bills.

Mao ni rason nga ang unta matabang pa nga sakit, mograbe na hinuon ug samot  mas nidako hinuon ang bayrunon.

Naa tinuod mga tambalanan sa gobiyerno nga pwedeng modawat kanila, apan tungod sa kadaghan sa mga pasyente, makapawala say gana sa mga tawo kay dugay kaayo silang maatiman.

Kana sa mga public hospitals, ang pasyente maabtan pa og duha ngadto sa upat ka oras ayha pa maatiman tungod kay naa say daghang nakauna na.

Kung dili pa ka magtinga dili ka atimanon dayun, mao na ang makapasakit sa buot sa mga tagtungod nga makitang gaantos lang gihapon ilang pasyente bisan naa na sa ospital.

Lahi sad kaayo ni ang sitwasyon kung sa pribadong ospital dad-on ang pasyente, kay atimanon man dayun kini. Pero , kada serbisyong gihatag ngadto sa pasyente nagpatak ang metro.

Maayo lang na sa kwartahan ug kadtong dunay health care insurances nga covered ang matang sa sakit. Kung wala gani ka ani, antosa nalang ang public hospitals.

Sa usa ka survey sa Boston Consulting Group, nasuta nila nga 64 porsiyento sa pamilyang Pilipino dili kayang mobayad og P10,000 nga hospital bills nga di kinahanglang mangutang.

Mao daw ni ang usa sa mga rason sa mga  Filipino nga manarbaho sa abroad para dunay makuhang basic healthcare para sa ilang kaugalingon didto ug para sa ilang mga minahal sa kinabuhi dinhi.

Basi ni sa survey nila sa 1,337 ka OFWs gikan sa Amerika, Middle East, Asia ug United Kingdom niadtong Hunyo 2025.

Dinhi sa Pilipinas, naay PhilHealth nga dako og tabang. Naa say programa sa gobiyerno nga “zero hospital bills” nga gikalipay sa mga tawo.

Ang kuwang ra gyud sa Pilipinas mao ang dugang mga public hospitals nga kompleto og mga gamit ug mga tawo.