EDITORYAL — Stable nga kuryente

Nakasinati og pipila ka oras nga blackouts ang nagkadaiyang mga lugar dinhi sa Central Visayas tungod sa kakulangon sa supply sa kuryente ug sa nagkadakong demand sa enerhiya diri sa rehiyon.

Ang National Grid Corporation of the Philippines niingon nga kining mga grid alerts nga ilang giisyu matag adlaw resulta ni sa kakulangon sa supply sa kuryente.

Hinuon dili tibuok adlaw nga walay kuryente apan sagad ni nahitabo gikan sa hapon hangtud gabii. Mga oras nga kusog kaayo ang konsumo sa kuryente sa mga tawo.

Matud pa sa mga advisories sa NGCP, gawas sa taas ang demand anang mga orasa nagkulang sad ang supply tungod sa nangaguba nga mga planta sa kuryente.

Nakapuno sad daw sa problema ang nahitabong linog didto sa Mindanao.  Ang kabisay-an nagkonektar og kuryente gikan didto sa Mindanao.

Pero angay ba nga motuo nalang ang publiko ani nga rason? Pila ka planta man ang nangaguba ug nganong wala man kini paspasi sa pagpaayo?

Unsa may gibuhat sa Department of Energy aning kakulang sa supply sa kuryente sa nasud nga wala man nag-urong ang kalamboan sa mga rehiyon.

Kana palang nga naay naaberyang planta nakaapektar na og maayo, unsaon nalang kung naa gyuy dagkong katalagman ug ubay-ubay nga planta ang magrabehan?

Gikinahanglan sa nasud ang abundang reserba sa kuryente, sa pagkakaron klaro kaayong wala ta ani.

Naay renewable sources sa halos tanang bahin sa nasud, kani maoy angay gastohan sa gobiyerno para mapuslan.

Libre ra unta kining tanan, kinahanglan lang gyud tukoran og imprastraktura pa magamit ang enerhiyang ma generate ani, sama sa solar, wind, hydro, geothermal ug uban pa.

Aron kung magkinaunsa nga naay rehiyon nga magrabehan sa katalagman, o bisan og naa pay krisis sa lana sa Middle East, dili gyud maapektahan og dako ang nasud.

Maayo tingaling dunay congressional inquiries nga buhaton para makahimo og mga balaudnon para makasigurong wala putol ang supply sa enerhiya sa nasud nga dili maimpluwensiyahan sa krisis, katalagman, ug unsa pang rason.

Kung gusto gyud molambo sa usa ka nasud, kinahanglan nga naa kini stable nga supply sa kuryente.