EDITORYAL - Way pagtahod sa mga Pilipino

Nagkagrabe ang sitwasyon karon sa Senado tungod aning patas-anay og garbo sa mayoriya ug minoriya. Ang resulta ani, daghang mga unta balaudnon nga para sa kaayohan sa katawhan ang nangatanggong.

Kagahapon, duna untay sesyon ang Senado, apan bisan usa walay nitunga nga mga miyembro sa mayoriya pinangulohan ni Senate President Alan Peter Cayetano. Samtang gapaabot ang minoriya sa Senado sa pagsulod sa mga mayoriya, nag live sa social media si Cayetano.

Iyang gipasanginlan ang minoriya nga gusto nilang sila maoy mamuno sa mga komitiba. Butang nga medyo dili kaayo lawom nga rason para dili motunga sa sesyon ang mayoriya.

Namasangil sa siya nga gisigehan og sulsol ang iyang mga kauban sa mayoriya para mobalhin sa ilaha.  Gisegundahan sab niya ang mga gipasangil ni Senador Jinggoy Estrada nga giduol siya para pabalhinon sa minoriya aron dili na siya gukdon sa iyang kaso.

Si Estrada nabilanggo karon tungod sa flood control controversy diin siya giakusahang nidawat og kickback nga kapin P500 milyones kauban ang mga kanhi DPWH officials.  Gikasohan siya og graft ug plunder sa Sandiganbayan 2nd ug 5th Divisions ug gidakop human nalutsan og warrant niadtong Lunes.

Human sa pagdakop kang Estrada namauli ang mayoriya, wala na mapadayun ang ilang trabaho sa Senado kay walay quorum. Apan kagahapon, wala na sab sila motunga.

Tungod ani, nasagmuyo ang minoriya ug nanawagan kang Cayetano sa pag-resign tungod kay napakyas kini sa paghimo sa iyang tahas isip Senate President.

Matud pa sa minoriya nga basi sa Rule XIV, Sec. 41 of the Rules of the Senate mahimo lang nga iuktaba o i-postpone  ang sesyon kun dunay konsultasyon sa majority leader ug minority leader ug sila parehong magkauyon.

Kun magkadugay nga ingon ani ang buhaton sa mayoriya, husto ang giingon ni Senador Panfilo Lacson nga daw gi-hostage sa mayoriya ang Senado.

Ang giingon ni Senador Raffy Tulfo aning bahina, tinuyo gyud ni Cayetano kining paglapas sa Senate Rules ug pagpakita sa seryusong walay pagtahod sa institusyon ug sa katawhang Pilipino.

Pagkatinuod, dili lang ang Senado ang na-hostage ani kondili hasta pud ang mga balaudnong para unta sa kaayohan sa nasud ilabi na sa mga Pilipino nga maoy nagbotar nila sa maong pwesto.