Luwas pa ba ang atong Katilingban?

Laing batan-ong babaye ang gikutloan sa iyang kinabuhi didto sa lungsod sa Alcoy sa Habatang Sugbo ug ang gitumbok nga responsable ang usa ka tricycle driver kinsa nadakpan ra usab dayon sa mga otoridad human sa krimen nga iyang gihimo. Miani og kaligutgot sa katawhan ang gihimong linoog nga krimen sa suspek ngadto sa dalaga.

Ang kamatayon sa 19-anyos nga si Jean Pryll Oropesa Belardo nakapasamot sa kahadlok sa mga tawo ug nakapaturok sa kabalaka kong unsa ka luwas ang atong dapit gikan sa kamot sa mga dautang elemento nga dili magpanuko sa pagkutlo sa kinabuhi sa mga inosenteng tawo, ilabi na sa kababayen-an?

Ang suspetsado, usa ka 42-anyos nga tricycle driver, giingong naila na sa maong dapit nga nabilanggo na kaniadto tungod sa ilegal nga droga ug duna nay mga reklamo sa pagpamastos ug pagsulay og lugos sa iyang mga pasahero. Dinhi mosulod ang dakong kapakyasan sa atong sistema sa seguridad ug hustisya.

Kon duna nay nangaging mga reklamo batok niining maong drayber, ngano nga gipasagdan man gihapon siya nga makabiyahe ug makapangita og mabiktima? Hinuon mao kiniy nakaparat sa atong balaod kay gamiton man dayon ang katungod sa usa ka tawo nga manginabuhi, wala naman siya sa bilanggoan busa makahimo na siya sa paghimo sa iyang mga bulohaton.

Klaro kaayo nga ang illegal drugs nagpabiling dakong kanser sa atong katilingban nga maoy maghari sa panghunahuna sa usa ka tawo nga nagumon niini. Sama nalang sa suspek sa krimen, kong tinuod man ugaling nga tiggamitan siya og illegal nga drugas hangtud karon. Kong pwede pa lang kutloan usab sa iyang kinabuhi kining tawhana aron dili na siya makamugna og kadaut sa iyang isi’g ka tawo. Apan sa katlingban nga gihabolan sa balaod kinahanglan gyud kita nga mosunod niini.

Samtang dako usab kaayo og natabang ang teknolohiya sa pagsulbad sa krimen sama sa GPS tracking sa iPad sa biktima. Daling natultolan ang suspek sa wala pa kini hingpit nga nakasibat uban sa iyang pamilya. Kudos sa kapolisan sa Alcoy nga abtik kaayo nga nakadakop sa suspek ug sa langyaw nga karelasyon sa biktima nga nakahunahuna sa pag-trace sa GPS sa gadget sa biktima nga maoy yawe sa pagdakop sa suspek.

Dili nato puwede nga balewalaon isip usa ka "isolated case ang nahitabo sa babayeng biktima.  Kinahanglan nga dunay mas estriktong lakang ang mga LGU sa pagpanalipod sa ilang mga molupyo. Kong mahimo kadtong mga driver sa public transport nga adunay dautang record did-an nalang unta sa pagpamasahero. Kinahanglan nga mas pakusgan pa ang pag-roving sa mga barangay tanod, ilabi na sa mga hilit nga dapit sama sa dapit diin napalgan ang biktima.

Si Jean Pryll Belardo usa lamang sa daghang mga batan-on nga nabiktima sa mga dautan nga elemento sa katilingban. Samtang nagsubo kita uban sa iyang pamilya, manghinaut kita nga ang iyang kamatayon magsilbing mitsa aron mas magmabinantayon ug mas molihok ang atong kagamhanan sa pagwagtang sa drowga ug kriminalidad sa atong mga kadalanan. Dili nato tugotan nga ang kahadlok maoy maghari sa atong dapit. Hustisya alang kang Jean Pryll!