EDITORYAL - Kasuhan, nagpatakas kay Bato

Hindi na nakagugulat kung bakit mababa ang pagtingin ng ordinaryong mamamayan sa sistema ng hustisya sa Pilipinas. Kapag ma­l­iit na tao ang nagkasala, mabilis pa sa kidlat ang pag-aresto at agad ikukulong. Ngunit kapag ang maysala ay makapangyarihang mambabatas o senador, mismong ang Senado ay nagiging ma­laking kuta at kanlungan ng mga nagtatago sa batas. Ang naganap na pagtakas ni Sen. Ronald “Bato” dela Rosa noong madaling araw ng May 14, 2026, sa tulong ni Sen. Robin Padilla, ay garapalang pambabastos sa hudikatura.

Pilit na naghuhugas-kamay si Padilla sa pagsasabing nakisakay lamang si Dela Rosa sa kanyang sasakyan dahil wala itong sundo. Subalit ang mga palusot na ito ay tuluyan nang winasak ng imbestigasyon ng Criminal Investigation and Detection Group (CIDG). Sa pagsusuri ng mga kuha ng CCTV, malinaw na ang pagtakas ni Dela Rosa ay planado, at binuong operasyon ng mga makapangyarihang tao. May kasama pang backup na sasakyan na rehistrado sa mismong tiyuhin ni Padilla na taga-Angeles City, Pampanga. Ang paggamit sa kanyang Deputy Chief of Staff na si retired colonel Jean Robles ay patunay na ginamit pa ang pondo at makinarya ng pamahalaan upang patakasin ang puganteng nahaharap sa mga krimen laban sa sangkatauhan.

Ang masakit na katotohanan, hindi lamang si Padilla ang nagkasala rito. Ang buong mayorya­ ng Senado sa ilalim ng pamumuno ni Caye­tano­ ay kasabwat. Matapos gamitin ang pisikal na boto ni Dela Rosa upang mapatalsik si dating Senate President Tito Sotto, binuhat ng mayorya ang konsepto ng “protective custody” upang harangan ang pag-aresto ng NBI, sa kabila ng opisyal na pagbasura ng Supreme Court sa petis­yon ni Dela Rosa. Ngayon, pilit pa nilang binabago ang mga patakaran ng Senado upang payagan­ si Dela Rosa na bumoto habang nagtatago. Dapat ipaalala ng Department of Justice (DOJ) kay Padilla at sa kanyang mga kamag-anak ang bigat ng Presidential Decree 1829 batas laban sa Obs­truction of Justice. Para sa mga opisyal ng pamahalaan, ang paglabag na ito ay hindi lamang nagtatakda ng pagkakakulong, kundi may ka­lakip na habambuhay na pagbabawal na huma­wak ng anumang pampublikong tungkulin. Ka­rapat-dapat lamang na hulihin at sampahan ng mabigat na kaso ang mga nagkanlong kay Dela Rosa, kabilang ang scalawags sa Philip­pine Na­tional Police (PNP) na nagbigay pa umano ng proteksiyon at mga lisensiya ng baril sa senador.

Ang paghaharap ng kaso laban kay Robin Padilla ay magandang simula, ngunit ang pinal na tagumpay ay makakamit lamang kapag ang mga nagmamalinis na mambabatas ay tuluyan nang iniharap sa korte, hindi bilang mga mararangal na senador, kundi bilang mga karaniwang maysala na sumira sa tiwala ng bayan.