El Niño

Sugod karong sunod buwan, magsugod na ang huwaw. Hinuon, makasinati pa kiya og panagsa nga uwan, apan inigka Agosto ug Septiyembre, mograbe na pag-ayo ang kainit ug niining higayona, mohubas na ang atong mga tinubdan sa tubig.

Ang World Meteorological Organization mibanabana nga ang “peak season” sa El Niño masinati nato dinhi sa Pilipinas karong Oktubre ug gituohan nga molungtad pa kini sa Pebrero sunod tuig.

Niining mga panahona, swerte na kaayo kon dunay bisan ginagmay’ng uwan, ug siguradong apektado niini ang mga tanom sa mga mag-uuma, sama sa kamaisan, kahumayan, kamotehan, kabuwakan.

Sa miaging 2023 ug 2024, gibanabana nga P2.7 Billion ang kadaot sa mga produktong agrikultura tungod sa grabeng huwaw.

Ang katawhan nakasinati og pagnihit sa tubig kay ang mga tinubdan mihubas.

Bisan ang mga water dam sa Luzon, Visayas ug Mindanao, nahubsan. Pagka karon gani, ang heat index panahon sa alas 12 ngadto sa alas 2 sa hapon, usahay moabot sa 42 degrees celcius.

Dinhi sa Cebu City, ang Metro Cebu Water District maproblema gyud kon moigo ang grabeng huwaw, ug apektado niini ang kaliboan nga konsumedor og tubig sa MCWD.

Maihap na lang ang mga tabay nga kakuhaan og tubig dinhi sa kinapusorang bahin sa Cebu City.

Tungod niini, ang JE Hydro & Bio-Energy Corporation nga maoy major supplier og tubig sa MCWD nga nagkuha og supply sa Barangay Lusaran, nangandam na.

Gipuno na daan sa JE Hydro ang ilang kapin sa tulo ka ektaryang lagoon nga may giladmon nga tulo ka dupa, ug gipundohan na kini daan og billions ka litro nga tubig gikan sa limpyo nga Lusaran river.

Kini aron nga kon ang MCWD manginahanglan og dugang supply nga tubig, makahatag sila dayon. Ang tubig nga gisulod na sa JE Hydro sa hilabihan ka lapad nilang lagoon, limpyo na kay giagi na sa ilang kahimanan.

Pero kon gamiton na ang maong tubig gikan sa lagoon, iagi kini pagbalik sa makinarya sa JE Hydro aron sa pagsiguro nga limpyo kini ug mahimo ra nga mainom.

Pagka karon, 20 million liters nga tubig ang gisuplay sa JE Hydro kada adlaw ngadto sa MCWD, apan matud ni Engr. Joffrey Hapitan, ang chairman sa JE Hydro, makahimo pa sila nga mosuplay og dugang 10 million liters kon magkinahanglan ang MCWD.

Unta, ingon usab niini ang himoon sa ubang mga supplier og tubig sa MCWD aron dili kaayo maproblema og tubig ang mga konsumedor.