EDITORYAL - Katungod sa partners pagdesisyon

Dunay giduso nga ordinansahon sa Konseho sa Dakbayan sa Sugbu nga nagtinguhang ilhon ang papel sa mga ‘partners’ nga same sex o parehong mga lalaki o parehong mga babaye sa paghimo og mga desisyon para sa ilang pares sa panahon sa medikal nga emerhensiya.

Apil sa pag-ila ani ang ilang katungod ngadto sa ilang mga partners nga makabisita, moatiman kanila kung sila mahospital o masulod sa mga health facilities sa Cebu City. Apan dili lang dapat kutob ana ang ilang mabuhat.

Unsaon nalang kun pananglitan wala ang mga kadugo, unya gikinahanglan gyud og consent  para paghimo og mga medical procedures sa pasyente ilabi na kun naa sa peligro ang kinabuhi niini apan dili na makapirma o makahimo og desisyon tungod sa iyang kahimtang.

Ikaduha ana, ang kabahin sa hospital bills, ilabi na ang mga pribadong tambalanan nga gustong manigurado nga mabayran ang ilang serbisyo maong kinahanglan sila og garantiya gikan sa pasyente o sa mga kadugo nga tagtungod, dili man ilhon ang partner anang bahina.

Tinuod giila na sa katilingban ang kanang pagpuyo-puyo sa mga babaye ug lalaki ug bisan same sex partners . Pero limitado kaayo ang proteksyon nila sa ubang mga butang, apil ana ang sa paghimo og desisyon nga nag-involved og kwarta o tulobagon.

Si Konsehal Michelle Abella Celiona nga maoy nangamahan sa maong ordinansahon nagtinguhang dili lang paghatag og katungod o gahum sa mga partners para  modesisyon sa panahon sa medical emergencies, kondili,  pagsiguro ni nga maatiman dayun ang pasyente.

Pero kinahanglan nga protektado sab ang partners ug ang mga health facilities sa legal nga pamaagi. 

Kaning ordinansaha maghatag og patas ug makiangayong tratamento sa mga same sex partners diha sa mga tambalanan. Pero kinahanglan nga legal kini.

Usahay ang naay diskriminasyon diha sa mga tambalanan kay ang mga partners o kapuyo wala gikonsiderar nga tagtungod ug dili sila mahimong makadesisyon para sa ilang pasyente.

Kaning mga ingon ani nga sitwasyon tinuoray gyud ning nahitabo karon, busa maayo nga naay ordinansang sama niini. Mas labing maayo pa gani kun naay nasudnong balaod parehas ani para protektado gyud tanan, dili lang ang same sex partners kondili hasta pud ang mga nagpuyo-puyo.