Maluoy ka

Ako nga i-commend ang mga sakop sa Philippine Drug Enforcement Agency sa malampuson nilang operasyon sa pagsakmit sa gibana-bana nga 20 ka kilong gituohang Shabu nga nagkantidad og P136 milyones ingon man sa pagkasikop sa mga nagpayuhot niini.

Gidimalas lang ang nagpayuhot sa maong gidaghanon ug gidak-on sa kantidad sa drugas kay nadakpan sila sa mga sakop sa PDEA ug suwerte ang mga nakalusot sa pagpalusot kay wala sila madakpi.

Sa akong pagbana-bana mas daghan ang mga nakalusot nga nagpayuhot og gidiling drugas kay sa mga nababagan. Kay kun daghan pa ang nababagan nga gidili nga drugas dili unta kini magbaha sa atong komunidad.

Dali ra nga mailhan kun nagbaha ba ang drugas o nagnihit tungod sa law of supply and demand. Momahal gani ang drugas buot ipasabot niana nagnihit ang drugas sama sa panahon ni kanhi Presidente Rodrigo Roa Duterte diin ang pakete sa Shabu nagkantidad ang tag P500.

Kun daghan man ang nakalusot nga gidili nga drugas dili nato mabasol niini ang PDEA kinsa maoy gitahasan ug nangunang ahensiya sa gobiyerno pagsulbad sa suliran sa drugas. Kini tungod kay wala silay igong gidaghanon sa mga personahi nga mopugong sa pagbaha sa gidili nga drugas sa komunidad.

Dinhi lang sa Sugbo, 12 lang ka mga PDEA agents o personnel ang nagbantay sa gidili nga drugas. Anaa man tuod ang mga polis ug ubang law enforcement agencies nga mitabang sa PDEA apan dili kini makadepende kanila tungod kay dili lamang kini ang gitutokan nilang trabaho sama sa mga polis.

Sa gidaghanon sa PDEA agents nga gideploy sa isla sa Sugbo, dinhi palang pildi na sila sa gidaghanon sa sindikato sa gidili nga drugas nga nagpakatap og daghang drug pushers.

Sa tan-aw ninyo, sa gidaghanon sa PDEA agents nga nakigbatok sa gidili nga drugas, seryoso kaha ang gobiyerno sa pagpakigbatok sa gidili nga drugas o for compliance lamang? Maluoy ka.