Sa higayon nga wala gyud kitay mahimo

Basaha: Jn. 19;25-34

Dinhi sa atong lalawigan bugtong ang Ronda lamang ang nag debosyon sa Our Lady of Sorrows kun Mater Dolorosa. Kining maong debosyon sa mahal nga inahan mora’g dili kaayo inila tingali kaha ang mga tawo hadlok og sakripisyo kun pag-antos. Alang gud nila ang pagdebosyon sa Mater Dolorosa maoy magbanlod kanimo sa hilabihang pag-antos.

Apan alang kanako dili kita luwas sa pag-antos.. Gani ang kahibalo nga dili ta kabayran sa nagpakautang kanato kasinatian man sa pag-antos. Kining maong kasinatian maoy nagnudnod kanato sap ag overthink. Apan sa laing bahin kun sud-ongon nato ang pag-antos ingon nga kahigayonan sa pagsinati sa presensiya ug gugma sa Dios alang kanato, usa naman kini ka dakong kasinatian sa pakig-unong. Ministry of Presence ang tawag niini.

Ang Mahal nga Inahan nagbarog sa tiilan sa krus ang nag-antos usab. Kining maong pag-antos maoy nakapahimo niya nga mas naduol pa gyud sa kahimtang sa iyang anak. Helpless man tuod siya apan nagpabilin siyang malig-on. Kahilom lamang ang nasinati niini. Bugtong kahilom ang nihari niadtong mga panahona.Dunay  mga higayon nga buot kong pugngan ang mga luha nga modagayday sa akong aping sa matag higayon nga masinati ko ang pag-antos personal man o sa uban. buot kong mogawas nga lig-on. Buot kong mamahimong dili maapektuhan niini. Apan sa akong paghimo sa ingon the more nako nga gipaantos ang akong kaugalingon. Wala nako katugoti ang makaalim nga gugma sa Dios nga mohikap sa akong kasingkasing. Dili kahuyangan ang paghilak. Paghugas kini sa kasubo nga gihambin. Ang paghilak diha sa atong pakighimamat sa tanan nga nagkinahanglan ug  kanato nga nagkinahanglan usab, timailhan ug buhing pagmatuod nga kita mga tawo ug dili mga robot. Niadto ko sa Ronda aron motambong sa Misa Concelebrada. Ang managkotay og kandila nakapahinumdom Kanako niadtong higayon nga sama kanila ako usab nanlimbasog aron magsaulog sa mga ginagmay nga grasya….

Unsay kalambigitan niini sa Kalihukang Pastoral?

Ministry of Presence

Sa laing bahin,  ang mga pakulo ang mga kura paroko kun unsaon nila pagdumala ang ilang parokya. Ang uban daghang mga proyekto, ang uban daghang mga programa. Usa sa mga nakahatag nako og giya mao man ang sinuwat ni Rick Warren nga libro:”the Purpose Driven Church.” Dili siya katoliko ug usa siya ka pastor apan ang iyang mga sugyot praktikal ug makahuloganon.

Matud pa niya nga dili maayo nga imong daghanon ang programa ug gimbuhaton kun ang imong sukaranan o pundasyon huyang ra kun itandi sa imong mga programa. Husto siya. dili lalim ang mag-ugmad labina kun mao  pay imong pagsugod. Kinahanglang careful ka labina kun sa paghimo og positioning sa mga tawo diin imong himoon ang pag-categorize sa mga tawo ingon nga crowd, congregation, core group ingon man ang mga committed diha sa imong organisasyon.  Mao nga ang akong gihimo for the mean time mao ang Ministry of Presence lang una. Ang prinsipyo mao nga ang mga tawo maka feel nga duol sila sa simbahan ug visible ang ilang pari. Nga sa ato pa, dali ra duolon ug sayon rang pangitaon. Dili maayo nga ang pagdumala ug kapaspas ipasikad lang sa sentimentalism ug unrealism ang tanan kinahanglang nagasukad gyud sa reyalidad sa kinabuhi apil na niini ang panginabuhi. Kay mag-unsa man ang pagyawyaw sa maayong balita kun parokyano mo gigutom ug way sud ang bulsa…