WPS Victory Day

Motangkod na nga 10 ka tuig karong Domingo, Hulyo 12, sukad ang United Nations (UN) arbitral tribunal mipakanaog sa mahulagway nga landmark decision nga naghatag og katungod sa Pilipinas ug sa mga Pilipino isip maoy lihitimong nanag-iya sa West Philippine Sea.

Busa agi og paghandom sa maong kadaugan atubangan sa kalibutanong hukmanan, ang mga tigpasiugda sa Atin Ito Coalition nag-awhag sa mga Pilipino nga mosalmot sa mga kalihukan pagpadayag sa atong katungod sa WPS taliwa sa padayong pangangkon sa China.

Si kanhi Cebu City councilor ug Atin Ito Coalition local convenor Alvin Dizon miawhag sa mga Sugboanon nga makighiusa sa paghandom sa maong adlaw sa kadaugan sa Pilipinas batok sa China.

Matud ni Dizon nga ang paghandom sa arbitral award nga naangkon sa Pilipinas batok sa China usa ka oportunidad aron pagduso sa mas lapad nga kawsa aron masayran sa publiko nga ang Pilipinas ug ang mga Pilipino maoy dunay katungod sa West Philippine Sea basi sa balaod.

Isip kabahin sa lapad nga kalihukan karong Domingo nga ilang gitawag og West Philippine Sea Victory Day, ang Atin Ito Coalition nakig-alayon sa mga tunghaan ug mga non-government organizations.

Gipaabot nga ang mga tunghaan dinhi sa Sugbo mopakayab og dagko nga mga streamers pagsuporta sa katungod sa nasud sa West Philippine Sea.

Sa miaging buwan, ang konseho sa dakbayan sa Sugbo mipalabang og resolusyon nga nagdeklarar sa Hulyo 12 isip West Philippine Sea Victory Day.

Ang resolusyon gipangamahanan ni konsehal Paul Labra.

Ang maong lakang dali nga gihangop ni Rafaela David nga maoy lead convenor sa  Atin Ito Coalition ug presidente sa Akbayan.

Iyang gihulagway ang deklarasyon sa konseho sa dakbayan nga us aka lig-on nga lakang pagduso sa katungod sa nasud sa maong teritoryo.

Gidasig sa Atin Ito Coalition ang ubang mga local government units pagsunod sa gihimo sa konseho sa syudad sa Sugbo.

Mahinungdanon ang mga kalihukan nga sama niini aron pagpukaw sa katawhan nga magpakabana ug manginlabot sa maong isyu tungod kay daghan sa atong katiguwangan ang miula sa ilang dugo aron atong makab-ot ang kagawasan ug pagprotehir sa teritoryo sa atong nasud.