Nakapuntos si Robin

Daghan ang misuporta ni Senador Robin Padilla sa iyang sugyot nga undangon na ang pagpatuman og senior high school kay naghatag lang kini og dugang kahasol sa mga ginikanan.

Matud ni Padilla nga angay’ng himoan og kausaban ang Enhanced Basic Education Act ug dili na ipatuman ang K to 12 Program nga ang High School dugangan og duha ka tuig.

Gihisgotan nako kining mao nga isyu sa programa nako sa radio ug sa social media, ug daghan ang misuporta sa tinguha ni Padilla. Tinuod man nga hasol kaayo sa mga ginikanan ang pagpatuman og senior high school.

Husto si Padilla nga ang i-require mao ang Kindergarten class sa dili pa ang usa ka bata modayon sa elementarya.

Dayon. Gikan sa elementarya, upat ra ka tuig ang high school, ug mahimo na nga modayon sa college ang tinun-an.

Karon, sus, kahasol. Kinahanglan pa nga moagi og duha ka tuig nga senior high school nga dugang problema sa mga ginikanan.

Ang K to 12 Program gipatuman sa nasud atol sa administrasyon ni P’Noy kay nakumbinser man siya sa iyang education Secretary kaniadto nga si Armin Luistro nga miingon alkanse kuno ang mga Filipino kon mangaplay og trabaho sa laing nasud kay K to 12 na ang ilang edukasyon.

Ang nindot lagi unta nga dili lang pinugsanay. Kon ang ginikanan gusto nga patrabahoon sa abroad ang ilang mga anak, ug ang mga anak mismo maoy gusto nga mokuha og senior high school, sige.

Kon ang usa ka tinun-an gusto nga dili na mokuha pa og senior high school, tugotan ra nga modayon sa college. Kon human na siya mogradwar sa college unya gusto na siyang mo-abroad, aw siya ra maoy mabasol ngano nga wa siya mokuha og senior high school.

Daghan man gud kaayo sa mga tinun-an ang wa na hinoon makahuman pagtungha kay naut-ot ang panudlanan sa ilang mga ginikanan kay tiaw mo? Nadugangan og duha ka tuig ang ilang pagtungha?

Matud ni Padilla nga dili tinuod ang gipasiatab kaniadto sa administrasyon ni P’Noy nga ang makagradwar sa senior high school dili na maglisod sa pagpanarbaho, kay gani pagka karon base sa statistics, midaghan ang mga trabaho.

Ang akong duha ka anak, wa pa tawon makahuman sa ilang pag-eskwela kay naabtan man sa pagpatuman sa senior high school.

Kon wa pa ang senior high school, nakahuman na unta og kurso ang tanan nakong mga anak.

Unta, suportahan sa ubang mga magbabalaod kining tinguha ni Senador Padilla. Nakaingon ko nga nakaigo sab og maayong punto si Padilla da.