Fake news ang depensa?
Walo ka adlaw na lay nahibilin sa lugway ni Bise Presidente Sara Duterte pagtubag sa articles of impeachment batok niya. Wala siya magkuwang, mora pa man gani og nagsobra, sa mga abogado ug abogada (16 ang nagparehistro nga mga sakop sa iyang defense team). Pero ambot kon nakahukom na ba unsay ilang tubag:
• Mo-detalye na ba pagpanghimakak sa tanang mga pasangil nga giluwatan batok niya; oIgo lang pahinumdoman ang Senate impeachment court nga nag-ung-ong pang iyang petisyon sa Korte Suprema nga nagkuwestiyon sa impeachment proceedings sa House Justice Committee.
* * *
Nipasalig ang defense team nga motuman sa sugo sa impeachment court. Pero mahimo sang mousab sa ilang hunahuna. Sama sa pagbakwi sa saad nga moatubang si VP Sara.
Kon dili motubag ni moapil sa proseso (sama sa ilang pag-isnab sa mga kongresista), malaktod ang pre-trial activities (House prosecutors na lay konsultahon unsay mga ebidensiya ug pila ka saksi ang ipresentar). Pero natakda nang sugod sa husay unya pa sa Hulyo 6. Mahimo hinuong mas sayo kon mahinayon ang kausaban sa liderato sa Senado karong adlawa o sa sunod semana.
* * *
Mahimong mausab sang kalendaryo kon dili man makanselar ang impeachment trial kon hukman na sa Korte Suprema ang petisyon ni VP Sara. Kon dapigan na sab sa mga mahistrado ang depensa pinaagi sa pagdeklarar sa House proceedings nga unconstitutional, wala na say husay nga mahimong karong tuiga.
Pero kon pasagdan sa labawng hukmanan ang Senado paghimo sa ilang trabaho, sama sa pagtugot nila sa House Justice Committee, mosandig si VP Sara sa iyang alyadong mga senador.
* * *
Ang daotang balita para ni VP Sara mao nga tandugon ang liderato ni Senate President Alan Peter Cayetano (salamat sa ilang pagtago ug pagpaikyas ni Senador Bato dela Rosa ug kuwestiyonableng pagpamusil sa Senado).
Ug napukaw nang publiko sa pag-apura ug pagtarung sa impeachment trial. Kon dunay makalabaw sa iyang influencia sa majority bloc, kana mao ang public opinion. Nga kusganon nang naningil nga tubagon ang dugay na kaayong mga pasangil batok niya. Peligro kon tinuod ang pasidaan sa House prosecutors: Nga sa kalig-on sa ilang mga ebidensiya, fake news na lay dag-anan ni VP Sara.
* * *
- Latest
