EDITORYAL - Problema sa turismo sa PHL

Kagahapong adlawa nag-abot dinhi sa Sugbu ang nagkadaiyang mga lokal nga representante sa nagkadaiyang mga lugar sa mga nasud sa East Asia alang sa pagpahigayon sa East Asia Tourism Forum para magtinabangay para sa kalamboan sa turismo sa rehiyon.

Pinaagi sad ani, makat-on ang mga stakeholders sa turismo dinhi sa Pilipinas ilabi na diri sa Kabisay-an sa mga bag-ong ideya, pamaagi, estilo ug uban pa nga maoy nakatabang og dako sa industriya sa turismo sa mga silingan natong nasud. Pagkatinuod, dili mahutdan og mga tourist destinations ang Pilipinas, gani tungod sa kadaghan dili na kinahanglan pang i-develop ang uban pang mga dapit nga wala pa gyud mahilabti para naay magpabiling natural kaanyag nga mga dapit nga wala mamalmal sa tawo.

Ang kinahanglang tutokan ug angay nga seryusohon sa gobiyerno ug sa mga tourism stakeholders dinhi sa Pilipinas ilabi na sa Kabisay-an mao ang pagpalambo sa kasamtangang serbisyo ngadto sa mga turista.

Dili na kinahanglang mogasto og mahal para ma-promote ang mga nindot nga lugar. Tungod sa social media karon, dali na kaayong isabwag sa kalibotan ang mga impormasyon bahin sa mga nindot nga tourism spots sa nasud.

Kana kun kaning mga tourist destinations nato affordable sa mga lokal nga turista. Tinuod naay discounts sa pipila ka mga resorts ang lokal nga turista komparar sa mga langyaw, pero ang diskwento dili man tanan.

Naay mga resorts nga ang diskwento ihatag para lang sa registration fee o entrance fees, ang palaliton sa sulod sa mga resorts, taga-liog ang presyo nga panglangyaw nga turista kamahal.

Gani mas barato pang suroyan ang nasud sa Vietnam, Thailand, Indonesia kung itandi sa mga tourist destinations nato dinhi sa ato.

Tingali kinahanglang usbon sa mga stakeholders ang ilang presyo, kay mao nay nakapa-discourage sa mga lokal nga turista nga unta makatabang sa pag-promote niini.

Karong mas barato pang suroyan ang mga silingang nasud,  mas langawon ang atong lokal nga turismo dinhi.

Una sa tanan, kinahanglang gamiton isip tourism ambassadors sa mga ahensiya sa gobiyerno sama sa Department of Tourism ug mga local government units ang ilaha mismong mga konstituwente ug lokal nga mga turista, dili kay patagmon.