Butang-butangan og sala

Mirekomenda ang Ombudsman nga pasakaan og kaso’ng plunder ug bribery si Senador Rodante Marcoleta tungod kay nakadawat kini og minilyon nga campaign donation sa miaging piniliay.  Mora’g nanimaho’ng pagpanglutos na man kining gibuhat sa Ombudsman labi na kay nagsugod na ang impeachment sa bise presidente.  Haum kining gibuhat sa Ombudsman sa tambag sa usa ka pilosopo nga nagkanayon, “Kon gusto nimo nga gun-obon ang imong kaaway, isangyaw ang mga pulong nga wala niya masulti ug butang-butangi siya’g salâ nga wala niya mabuhat.”  Madahaan!

Naghuot ang classroom

Misang-at og petisyon ang magtutudlo nga si Barry Tayam sa Supreme Court alang sa pagluwat og Temporary Restraining Order (TRO) batok sa pagpatuman sa DepEd Memorandum 012 nga nagmando nga wagtangon ang upat ka academic strands sa Grades 11 ug 12 ug ilangkob na lang kini sa duha ka pathways nga mao ang Academic ug Technical-Professional.  Unahon lang unta sa DepEd ang pagsulbad sa suliran sa kakulang sa classroom inay mogasto aron lang pag-usab-usab sa curriculum. Matud pa bitaw sa usa ka estudyante, “Moingon si Maam nga “No Cheating” inig exam, apan unsaon man pagpatuman nga ang classroom huot pa man kay sa jeep nga pasahero-an? Muleeng!

Himoon’g ungo-ungo

Namahayag si MMDA General Manager Nicolas Torre III nga andam siya moapil sa pagpangita ug pagdakop ni Senador Bato dela Rosa kon ugaling manduan siya sa presidente.  Dugang pa ni Torre, ang pagdakop sa senador kinahanglan nga walay sambog nga personal o politikanhong konsiderasyon.  Buot na usab mo-papel si Torre.  Nahiga’am tingale siya sa “kasikat” nga iyang natagamtam sa pagdakop niya ni kanhi Presidente Duterte.   Matud pa sa akong amigo, “Aduna gyu’y mga tawo nga ganahan magpasikat nga mosugot na lang bisan himoon’g ungô-ungô, abat o kontrabida basta makaapil lang sa salida.”  Fezteleern!

Lalaki ang bride

Mikatap sa social media ang kasal didto sa Palimbang, Sultan Kudarat diin ang pangasaw-onon nabulgar nga usa diay ka lalaki.  Samtang nangayo’g pasaylo, midepensa ang bayot nga pangasaw-onon nga wala siya mangilad kay nasayod na man kuno daan ang iyang pamanhonon sa iyang kahimtang.  Gawas nga gidili kini sa balaod sa tawo ug sa simbahan, daghan pa usab kanato ang dili pa makadawat ug daw ngilohan pa nianang gitawag nga gay marriage. Apan komento pa sa akong amigo, “Ok ra man ang gay marriage basta lalaki ug babaye lang ang magminyo.” Ateerr!

Pagpanigarilyo ug kakabos

Segun sa pagtuon sa UP Diliman professor ug data scientist nga si Dr. Rogelio Alicor Panao, nasuta nga mas kuyanap ang pagpanigarilyo sa mga kabos nga banay kon itandi sa mga adunahan.  Gisuportahan sa maong pagtoon ang kasayoran nga adunay koneksiyon ang kakabos ug ang pagpanigarilyo.  Dako ang gasto ang pagpanigarilyo nga kon gitigom pa kuno, hayan nakapalit na og sakyanan ang nagbisyo niini. Apan sukwahi ang pagtoo sa akong amigo kay matud pa niya, “Ang iyang silingan dili gyud manigarilyo, apan hangtud karon, wala gani kapalit bisan scooter na lang.”  Pagkatoytoy!