Politikanhong lamat

Matud pa ni Department of Agriculture Secretary Franisco Tiu Laurel, Jr. nga nagkasabot na ang kagamhanan ug mga rice industry stakeholders nga ipatuman ang suggested retail price (SRP) nga P53 matag kilo sa bugas aron kuno mabalanse ang ginansiya sa mga mag-uuma talli sa budget sa mga konsumidor. Base sa atong kasinatian, dakong tinonto ang price ceiling nga ipatuman sa gobyerno. Kay matud pa bitaw, “Ang pagpatuman og price ceiling sa bugas usa ka  politikanhong lamat (magic) sa gobyerno.  Tungod niini, mahimong bayani ang politiko og usa ka adlaw, apan takulahaw’ng mahanaw usab ang suplay sa bugas sa dugay’ng panahon.” Fezteleern!

Puli-puli lang

Mi-demiter sa katungdanan isip partylist representatives sila si Rep. Nathaniel Oducado (1Tahanan) ug Rep. Franz Vincent Legaspi (Pinoy Workers) agi’g pagtuman sa ilang kasabutan nga term-sharing sa ilang kauban’g nominees.  Daw gi-isip man lang nila nga personal nga kabtangan ang ilang posisyon nga mahimo lang nilang ipasa-pasa pinaagi sa panagsabot.  Haum ang komentaryo nga nag-ingon, “Dili pagpuli-puli sa pwesto sa mga politiko ang gikinahanglan sa katawhan; ang gikinahanglan mao nga pulihan na nila ang nag-umog ug naglang-og na nga lampin (diaper) sa atong ekonomiya.” Muleeng!

labihan ang kalangay

Gikataho nga adunay kapin sa 32,000 ka bag-ong teaching positions sa tibuok nasud ang gi-aprobahan sa DBM alang sa School Year 2026-2027.  Tumong niini nga makunhoran ang overcrowded nga mga classrooms ingon man ang workload sa mga magtutodlo.  Dakong alibyo kini sa atong education system ug paghatag kahigayonan sa atong mga graduates nga makatrabaho.  Hinaut nga dili langay-langayon ang paghire sa aplikante tungod sa laing konsiderasyon.  Kay komento pa sa usa ka aplikante, “Labihan kahinay ang proseso sa pag-hire kay dalaga pa ko sa akong pagpangaplay apan naminyo na lang ko pero hangtud karon, nagpaabot lang gihapon sa resulta.”  Madahaan!

Suliran sa pagpakilimos

Gitun-an karon sa kagamhanan sa dakbayan sa Sugbo ang inisyatibo sa pag-relocate sa mga makililimos ngadto sa kabukiran dayon tudloan ug bansayon sila sa pagpanguma ug ubang livelihood nga programa.  Dako ug tulokibon ang kahimtang sa mga makililimos ug dili kay usa lang ka matang sa solusyon ang pagsulbad sa maong suliran.  Labaw na’ng dili solusyon ang mga balaod nga nagdili kanila pagpakilimos sa kadalanan.  Matud pa sa akong amigo, “Dili magsilbi ang anti-mendicancy ordinance kay ang tawo’ng gigutom dili mobasa ug mosuta sa mga lokal nga balaod una kini magpakilimos.”  Mao maan!

Gatas sa inahan

Naglaraw ang Phillippine Carabao Center (PCC) nga palapdan ang dairy buffalo program sa Sugbo kauban ang Cebu Provincial Government.  Gitumong ang maong inisyatibo sa pagpalig-on sa food security samtang naghatag usab og livelihood ug entrepreneurshio opportunities sa mga mag-uuma.  Gawas nga gamit sa pagpanguma ang kabaw (carabao or buffalo), nasayran nga maayo kining tinubdan sa mas makrema nga gatas.   Apan matud pa sa akong amigo, “Dunay mga politiko nga dili ganahan og gatas sa kabaw kay ang gusto nila, gatas sa inahan nga anaa pa sulod sa orihinal nga sudlanan.”  Pagkatoytoy!