Anugon kayo

Ang mga ginikanan sa napatay nga aktibistang taga Cebu City nga si Vince Francis Dingding nakahukom nga dili nila kuhaon ang lawas sa ilang anak didto sa punerarya sa Negros Occidental, ug pasagdan ra kini didto.

Ang kapitan sa Barangay Capitol Site ug ang kadagkoan sa militar, nagpatabang unta ni Cebu City Councilor Pastor Alcover Jr. nga matabangan ang pagpadala dinhi sa Cebu sa lawas ni Dingding nga naapil sa lima ka rebeldeng napatay sa gubat batok sa mga sundalo.

Ang gubat didto mahitabo sa duha ka barangay sa lungsod sa Cauayan, Negros Occidental kaniadtong miaging Sabado sa buntag, diin lima ka giingong rebeldeng NPA ang napatay.

Apan matud pa nga ang mga ginikanan ni Dingding wa nay tinguha nga kuhaon pa nila ang lawas sa ilang anak. Makapaguol, apan masabot nga grabe ang ilang kahiubos sa ilang anak kon ngano nga mao kini ang dalan nga gisubay luyo sa ilang pagpa-eskwela.

Masabot nimo nga garbo unta kaayo sa magtiayon nga ang ilang anak, utokan ug gani nahimong vice chairperson sa UP Student Council ug nakahuman sa Bachelor of Science in Computer Science, apan imbes mangita'g maayong trabaho, miipon na hinoon sa mga rebelde.

Paet kaayo sa usa ka ginikanan nga naninguha pag-ayo, nagpataypatay sa lawas pagtrabaho aron lang makaeskwela ang ilang anak, apan wa diay sila masayod nga hilom kini nga nadani sa mga tawo nga amigo rebelde.

Mao nga kamong mga ginikanan nga ang mga anak anaa magtungha sa University of the Philippines (UP), kanunaya ang pagpahimangno sa inyong mga anak nga likayan nila ang pagsalmot sa mga kalihokan nga klaro kaayong gidumala sa mga tawong naglantaw lang og kagubot.

Wa tawo'y kalibutan ang mga ginikanan ni Dingding nga ang ilang anak tua na diay sa Negros ug miipon na sa mga rebelde.

Mao diay nga sa iyang profile account sa social media, dunay hulagway sa mga rebelde nga hitsas sa mga armas, ug duna siya'y giawhag nga kaila niya nga kuno mangandam na.

Dugay ra ko nga nakapangutana kon nganong sagad sa mga tinun-an nga madani sa mga rebelde gikan man gyud sa UP, nga unta sila gigastohan sa kagamhanan, apan makigbatok na man hinuon sa gobiyerno.

Angay unta kini nga pangitaan og sulbad sa mga nagdumala sa kagamhanan, ug unta dunay maayo nga pagtuon aron nga malikayan na nga dunay dugang pa nga mga tinun-an nga madani pagsalmot sa mga rebelde.

Dili man nato kapugngan kon duna ta’y wa mauyoni sa gihimo sa mga opisyal sa atong kagamhanan ug angay natong sawayon, apan nungka nga moapil kini sa armadong pakigbisog batok sa gobiyerno.