Basin nasayop lang

Adunay lakang nga palagpoton si Senate President Alan Peter Cayetano pipila lang ka adlaw human siya nahimong pagngulo sa senado.  Aduna kuno’y nadawat nga mga panghulga ang mga sakop sa bag-ong mayoriya apan masaligon hinoon si Cayetano sa iyang mga kauban nga dili magpadala sa mga hulga.  Dili ikahibulong ug gani gilauman man kining gipadayag ni Senador Cayetano.  Ang pangutana na lang kon unsa ka hugot ug ka-maatinud-anon ang 13 ka senador sa ilang baruganan? Basin maparehas sila sa panahom nga nag-ingon, “Dili ko gyud pakamatyan ang akong baruganan kay basin baya kon nasayop ra diay ko.”  Fezteleern!

Nagkinahanglan og kaisog

Gimando ni Ombudsman Boying Remulla ang 6-months preventive suspension ni acting Senate Sergeant-at-Arms Mao Aplasca tungod sa nahitabong pinusilay sa senado niadtong Mayo 13.  Miangkon si Aplasca nga siya ang unang mipabuto.  Adunay managlahing bersyon ug pasiatab ang mga ahensya sa kagamhanan sa maong panghitabo busa kinahanglan pa’g halawom nga imbestigasyon.  Alaut lang si Aplasca nga maoy nahan-okan sa pasiatab sa Ombudsman. Mao kana’y giingon nga, “Nagkinahanglan og kaisog ang pag-angkon sa sala, apan mas dakong kaisog ang gikinahanglan kon pasanginlan nimo ang uban sa imong sala.”  Muleeng!

Kaldero ug takuri

Adunay panagbingkil tali kang kanhi senador Antonio Trillanes IV ug ni DILG Secretary Jonvic Remulla kabahin sa kapakyas sa pagdakop ni Senador Bato dela Rosa kinsa nakompirmar na nga adunay warrant of arrest gikan sa ICC.  Gisaway ni Trillanes ang pagpangandak ni Remulla sa pagdakop sa senador.  Mibalos usab si Remulla pag-ingon nga nag-una lang ang hambog ni Trillanes, maoy hinungdan nga napildi siya sa tulo na ka eleksyon. Nag-iyahay na lang ang duroha og linabayay’g lapok.  Nahisama sila sa “Kaldero ug takuri nga mihingalan sa usag-usa nga itom ug bulingit.”  Madahaan!

Ngitngit pa’s alkitran

Gikonsiderar sa National Bureau of Investigation (NBI) sila sa Senador Robin Padilla ug Senate Sergeant-at-Arms Mao Aplasca isip mga “persons of interest” kabahin sa gikatahong pagsibat ni Senador Bato dela Rosa sa compound sa senado.    Adunay mga pagsaway sa mga legal experts ang paghingalan sa usa ka tawo nga “person of interest” tungod kay mahimo kining makadaot sa reputasyon sa hingtungdan. Matud pa sa akong amigo, “Ngitngit pa’s alkitran kining imbestigasyon sa NBI sa pagkahanaw ni Senador Bato mao nga gikuyog nila sila si Padilla ug Aplasca aron makunhoran ang ilang kahadlok sa kangitngit.”  Ateerr!

Paghipos Sa Basura

Nanawagan pag-usab si Cebu City Mayor Nestor Archival sa Department of Education (DepEd) nga lig-onon sa naulahi ang mga environmental practices sa mga tulonghaan, ug sa direkta’ng pagdugtong sa kampanya sa waste management sa dakbayan ngadto sa sektor sa edukasyon.  Kon matudloan ang kapin 100,000 ka mga tinun-an sa publikong tulonghaan sa maayong pamaagi paghipos sa basura, dako na kining tampo sa kalampusan sa kampanya sa dakbayan. Sugyot pa sa usa ka inahan, “Kinahanglan’g tudloan ang mga bata sa paghipos sa panit sa itlog, banana cue stick ug sa putos sa ice candy nga gibaligya ni Maam.”  Pagkatoytoy!