Saludo ko nimo Sir!

Nakadayeg ko ni Napolcom Commissioner Ralph Calinisan kay dili siya molaban sa mga polis nga makahimo og mga pagpangabuso, ilabi na ngadto sa mga sibilyan.

Masabot nako nga gusto ni Commissioner Calinisan nga malinisan ang bati nga imahe sa kapolisan pinaagi sa pagpahamtang og silot kon makasala ang mga polis.

Nabantayan ni Calinisan nga gi-downgrade ang kasong gipasaka sa PNP Criminal Investigation and Detection Unit (CIDU) ngadto kang Police Staff Sergeant Erwin Lagua.

Kini si Lagua nadestino isip sakop sa Quezon City Police District mobile force battalion, ug nalambigit kini og panag-away sa usa motorista didto sa C5 Road sa Pasig City pipila ka adlaw na ang nakalabay.

Nag-viral ang video sa maong hitabo human nga giatake ni Sgt. Lagua ang motorista nga si Jhone Vincent Cayanes ug nakaangkon kini og mga samad sa kalawasan, ug gibiyaan ra sa polis.

Matud ni Calinisan nga gipanid-an niya og unsay himoon sa mga opisyal sa kapolisan nga nagdumala sa imbestigasyon, ug wa siya makagusto diha nga matud niya klaro kaayong gi-downgrade ang kaso.

Nakapanglingo-lingo ang opisyal sa Napolcom pagkasayod nga ang gipasaka nga kaso sa CIDU batok sa polis mao lang ang Malicious Mischief ug Physical Injuries, nga matud ni Calinisan angay na man unta nga ang ipasakang kaso batok ni Lagua mao ang frustrated murder.

“Sobrang galit at labis akong nadidismaya sa tila maling at sinasadyang pagpapababa ng kasong isinampa laban sa sariling tauhan. Hindi katanggap-tanggap na tila pinapahina o pinapagaan ang kaso sa kabila ng malinaw na ebidensya at malinaw na pangyayari. Dapat tama, patas, at naaayon sa batas ang kasong isinasampa, hindi iyong tila may pagtatangkang pagaanin ang pananagutan,” matud ni Calinisan.

Gipasabot ni Calinisan nga kon maghimo’g abuso ang mga polis ngadto sa mga sibilyan, unya labanan ra usab sa mga kaubang polis, ang katawhan moyamiid sa kapolisan ug dili na sila mosalig niini.

Matud ni Calinisan nga ang kapolisan gisweldohan aron protehean ang katawhan, dili nga sila abusohan.

Gimando ni Calinisan ngadto sa Inspection, Monitoring and Investigation Service (IMIS) sa Napolcom nga pasakaan og kaso ug isyuhan og relief order si Police Corporal Benito Catungal, ang nag-imbestigar sa kaso ni Lagua.

Apil gani nga ilambigit sa kasong administratiba si Lieutenant Colonel Edison B. Ouano, ang hepe sa CIDU sa Quezon City Police District.

Husto baya si Calinisan kay kon ang mga polis nga makahimo og salaod, unya tapin-an lang sa mga kaubang polis bisan og klaro kaayong nakahimo og salaod, kanus-a man mabalik sa kapolisan ang pagsalig sa katawhan?

Saludo ko nimo Commissioner Calinisan Sir!