EDITORYAL - Kanaas sa Kongreso

Kagahapong adlawa, Lunes, Mayo 11, 2026 nakulit ang laing panid sa kasaysayan sa politika dinhi sa Pilipinas.  Kini human nga sa labing unang higayon dunay bise presidente sa Pilipinas nga na-impeach duha ka higayon sa House of the Representatives.

Ug sa samang adlaw pud,  nagkudeta ang mga miyembro sa Senado ug giilisan ang naglingkod nga presidente sa Senado sa lider sa bag-ong mayoriya nga mga pro-Duterte.

Kaning tanang panghitabo sa Kongreso sa Pilipinas kagahapon maisip nga “power plays” ug “political maneuverings” tali sa duha ka mga nagsangkang paksyon. 

Pipila kanila posibleng nagtago sa posisyon gikan sa giatubang nilang mga tulobagon may labot sa kampanya kontra kurapsyon. 

Nahitabo ang “kudeta” sa Senado samtang nangandam pa ang House Plenary sa botasyon para sa Articles of Impeachment batok kang Bise Presidente Sara Duterte.

Dunay mga pagdudang ang pagtangtang kang Senador Tito Sotto dunay koneksyon sa mahitabong impeachment hearing batok kang Bise Presidente Sara Duterte nga kagahapon sa hapon, gi-impeached sa House Plenary sa botos nga 257 ang pabor batok sa 25 nga dili pabor ug siyam ang ni-abstain.

Tuyo daw ani nga maimpluwensiya ang resulta sa botasyon, para kadtong mga nagduha-duha nga mga kongresista,  mobotar og no,  kung makita nilang ang liderato sa Senado nibali na pabor sa mga Duterte.

Pero ang nag-awas-awas nga gidaghanon sa mga kongresistang nibotar nagpakita lang gyud sa tinud-anay nilang sentimiyento bahin sa kaso sa bise.

Walay makapangangkon nga tingog kadto sa ilang mga konstituwente sa distrito kondili,  tungod kay walay bisan kinsang pinakataas og posisyon sa gobiyerno ang molabaw pa sa balaod ug Konstitusyon.

Ang bag-ong nilingkod nga Senate President nga si Senador Alan Peter Cayetano nga daan nga namahayag kontra impeachment ni VP Duterte sa unang impeachment case sa miaging tuig, namahayag dayun kagahapon nga walay koneksyon ang kudeta sa impeachment.

Pero karong sunod nga mga adlaw, silang 24 ka mga senador, 13 ka pro-Duterte majority ug siyam ka minority bloc magsilbi mga hukom sa impeachment ni VP Duterte.

Ang pangutana karon, mahatagan kaha og hustisya ang katawhan aning mga senador?