Ilang mga abogado
Dili maayo ang niaging semana para sa mga abogado sa mga Duterte. Usa nila nalabayan og laptop (kon tinuod ang huhungihong ug bisan computer-illiterate ang kliyente). Samtang duha nila gipulihan. Walay ganahan nga mosulti unsay ilang mga atraso.
Maong pulos pangagpas ray atong nadunggan. Ang nalabayan gikataho nga nagpataka lang og sulti nga walay pagtugot gikan sa kliyente. Ang duha nga gipulihan gikataho nga wala nay mga kontrata ug wala na ganahi ang kliyente sa pagpabilin nila. Kay pulos pakyas ang tanang mga petisyon nga ilang gipasaka sa niaging tuig.
* * *
Walay labot ang publiko nalabayan ba gyod og laptop ang abogado. Kliyente ang magbuot kasaligan pa ba. Pero posibleng ang insidente dako og implikasyon sa impeachment trial:
Sa wala pa ang gikatahong pagpanlabay, nipasalig ang defense team nga moapil sa husay ug nga ang kliyente moatubang sa mga senador; pero
Human sa pagpanlabay, nausab ang sulti sa defense team, gitimbang-timbang nila kon moapil ba sa husay kay nag-ung-ong pa sa Korte Suprema ang ilang petisyon nga nagkuwestiyon sa constitutionality sa impeachment proceedings sa Justice Committee sa House of Representatives.
* * *
Katungod sa mga Duterte ang pag-ilis og mga abogado. Sama nga sila ray makatug-an pila ang bayad sa kanhi mga abogado, sila ra say makahukom kinsay labing takos nga mo-representar nila.
May sukaranan ang mga Duterte nga mawad-an og pagsalig sa mga kanhi abogado. Kay nipasalig nga makagawas ang kliyente sa prisohan ug mabasura ang kaso kay walay hurisdiksyon ang korte. Pero human sa minilyon ka pesos nga gasto, napriso gihapon ug dunay full trial sa kaso.
* * *
Ang pag-ilis sa mga abogado maka-apektar hinuon sa mga kliyente sa bangis nga mga krimen nga gipasangil sa mga Duterte: Kon ang kausaban sa defense team gamiton na sab nilang sukaranan sa dugang nga paglangay sa hustisya nga dugay na nilang gipangandoy.
Ang bag-ong mga abogado mahimong moawhag sa korte nga tungod sa nagbuntaog nga mga dokumento sa pila na ka tuig nga imbestigasyon sa prosekusyon ug sa daghan sang mga dokumento nga natumpi sa mga kanhi abogado magkinahanglan sila og pipila ka buwan, mahimo gani nga maabtan og tuig, sa pagpangandam sa pormal nga husay.
* * *
- Latest
