EDITORYAL — Wa nay mapili?

Sa panahon karung dunay kaguliyang sa politika sa nasud, dili maayong makita sa tawo nga ang mga lider nagiyahay lang og patas-anay og ihi ug ilang garbo.

Naay mga nagpakaaron-ingnon nga naa sa husto ug nagsunod sa proseso ug sa balaod, apan ang tinuoray nahadlok sila nga mawagtangam og gahum.

Gustong ipamugos bisan sayup ug wala na masubay ang tinuod nga proseso para magpabilin sa pwesto.

Ang nakapait, naapektohan na ang ilang trabaho ug wala na maserbisyohi ang katawhan.

Hasta ang moralidad nawala na para lang gyud magpabilin sa ilang pwesto, bahala’g magkinaunsa kay nagsalig sila nga naay mga tawong mosuporta gihapon sa ila bisan og sayup na ug wala na masubay sa balaod.

Murag tungod anang ilang kahakog ug kahangol sa gahum, gusto nilang ipamugos nga husto ang sayup ug ang tinarung maoy sayup.

Ang ilang kasing-kasing naa ra gyud sa ilang partido para sa gahum ug impluwensiyang nagtangag ani.

Tungod kay sa partido naa silay proteksyon, sama sa pagtabon sa ilang mga krimen, kurapsyon, ug makuhang suporta sa sunod nga eleksyon.

Pila nalang man kahay nahibilin sa atong mga gipangbotaran nga mga leader ang tinuoray nga pro-people ug pro- country?

Kanang andam talikdan ang ilang partido, personal nga interes, gahum, impluwensiya ug negosyo kun gikinahanglan sila para sa kaayohan sa katawhan ug sa nasud.