Daghang pamilya ang gibuhi

Sumala sa COA 2025 Report on Salaries and Allowances, ang kalihim sa Department of Science and Technology (DOST) nga si Renato Solidum, Jr., nagpabilin nga maoy labing taas og sweldo nga opisyal sa gabinete sa tuig 2025.  Giingon nga ang iyang compensation package isip hepe sa DOST naglangkob sa iyang basic pay (P3.52M), allowances (P1.62M), bonus ug incentives (P1.09M) ug discretionary expenses (P262,000).  Bisan sa kadako sa sweldo sa atong mga opisyal, dili kuno gihapon maingon nga haruhay ang ilang kahimtang.  Kay matud pa sa kanhi presidente, “Dili gayod paigo ang sweldo sa mga opisyal sa gobyerno kay sagad kanila adunay duha o tulo ka pamilya nga gibuhi.”  Madahaan!

Prinsipyo vs. kwarta

Namahayag si Bise Presidente Sara Duterte nga daghan’g mga kongresista ang “naka-ganansiya” ug gihimong gatasan ang pagpirma sa articles of impeachment kon isumite na unya kini sa plenary sa Kongreso.  Wala hinuon niya hinganli ang posibleng mopirma sa impeachment apan gitoohan’g mokabat kini sa 180 ngadto sa 210 ka kongresista.  Baniog ang maong posibilidad tungod kay ang pagtanyag og salapi bugti sa usa ka dili popular nga gimbuhaton maoy bugtong paagi nga dali mosugot ang ang gisugo.  Haum kini sa panahom nga, “Ang kwarta magpalingkawas sa tawo pagbuhat sa dili ganahan niini nga gimbuhaton pinaagi sa pagsuhol sa uban aron maoy mobuhat.”  Fezteleern!

Huyang ang pag-binastos

Nanawagan ang social media personality ug entrepreneur nga si Diwata ngadto sa mga kanhi customer ug mga vloggers/bloggers nga bisitahon nila ang iyang bag-ong gitukod nga paresan sa Pasay City. Mipasalig si Diwata nga nag-usab na siya sa iyang kinaiya ug nga dili na siya magbinastos ug dili na dali’ng masuko.  Typical nga ehemplo ang kinabuhi ni Diwata sa tawo nga nisikat lang kadiyot, nagminaot na dayon.  Kon unsa ka habog ang iyang pagsulbong kanhi, mao usab ka sipa ang iyang paglugapak sa ubos.  Angayan tamdan ang panahom nga, “Ang pagka-bastos, usa ka huyang nga paagi pagpakita sa kalig-on sa kinaiya.”  Muleeng!

“Road” nga empleyado

Adunay panawagan sa Facebook nga nanawagan kang Cebu City Mayor Nestor Archival nga imbestigahan ang giingon nga dili makiangayon nga queing practices ug bastos nga kinaiya sa mga empleyado sa Cebu City Medical Center.  Inay “first-come, first served” basis, adunay mga pasyente nga mauna pagtagad kay adunay kaila sa hospital.  Taud-taud na kining maong reklamo apan walay nakita’ng alibyo.  Matud pa sa usa ka kritiko, “Hangtod nga padrino system ang pag-hire og empleyado ug dili pinaagi sa credentials ug merito, padayon gihapon nga adunay mga “ROAD” (rude) nga empleyado sa CCMC.”  Saoonz!

Small business, very hot

Mitiyabaw ang mga vendors’ organization sa pasangil nga nangolekta sila’g mokabat 300 pesos matag adlaw sa mga vendors isip service fees.  Sugyot sa organisasyon nga paimbestigahan ang maong ‘sayop’ nga alegasyon.  Mora’g naukay man ang dugay na’ng giampingan nga sekreto’ng pangwarta diha sa Carbon Market.  Mao kana’y giingon sa komedya nga “Small business, very hot (gamay’ng negosyo, initan).”  Pagkatoytoy!