Magmatngon ta

Tuguti ko nga mohatag og kasayoran para sa mga driver nga wa pa masayod nga ang paggamit og dugay sa brake sa atong mga sakyanan, mahimong makapadisgrasya kanato, nga mosangpot og pagkakalas sa kinabuhi.

Sukad sa akong pagkahimong professional driver kaniadtong 1977, kanunay na ko nga mobasa og mga balaod kalabot sa pag-drive og sakyanan, mobasa og mga balaod gikan sa Republic Act 4136.

Kini maoy rason nga gitudlo ko nga media representative sa Cebu City Traffic Management Board atol sa termino ni kanhi Mayor Michael Rama. Gusto ko nga pinaagi sa Renbor Patrol, makatabang ko.

Kon maglugsong ka, pananglit subay sa Trans-Central Highway gikan sa Barangay Tabunan paingon sa Balamban, taas man gyud kaayo na nga dulhogon, gamit og low gear, ayaw pagsalig sa brake.

Ayaw pagkambyada og high gear (kwarta ug kinta martsa) kay mosutoy ang sakyanan niana nga maglugsong. Sa unang mga minutos sa pagsige nimo’g tamak sa brake, mopugong pa na.

Apan sa kadugayan nimong pagsige og brake, moinit na pag-ayo ang brake drum ug ang imong brake lining, ug dili na kini mopugong. Hanoy ka na paingon sa ubos.

Unya, ang kuwang sa kasinatian nga driver, tamakan gyud niya pag-ayo ang pedal sa iyang brake, hangtud nga sa kakusog na sa pressure, mobuto ang rubber cap sa brake system.

Unsay mahitabo? Aw, samot na nga dili na mapugngan ang sakyanan nga mohanoy na sa ubos. Mao na nga sa mga aksidente, ang driver moingon dayon nga mi-malfunction ang brake, wa na mogunit.

Kini maoy nahitabo sa usa ka motorista, nag-drive og motor nga dunay angkas, mitungas sa bukid sa Pardo. Pagbalik niya, nagsalig nga kupot ug pilit kaayo ang iyang brake, aw wa makalahos sa ubos, nadisgrasya.

Patay ang driver sa motor ug ang angkas niya samaron kay wa na man mapugngi ang motor nga mibulhot paingon sa ubos ug nadam-ag sila. Mao na nga gusto gyud ko nga ang mga mag-drive og sakyanan, motoon gyud.

Sama ra gud sa mga naghupot og armas, daghang mga bag-o pa nga naghupot og armas, apil niini ang pipila ka polis, nga danghag kaayo ug wa magtoon sa mekanismo sa ilang mga pusil.

Resulta, naunay sa kaugalingon nilang armas nga nabuthan samtang nagkubi-kubi sa ilang pusil, ilabi na ang mga pistola.

Mao nga balikon nako sa pagpasabot, kinahanglan sa mga driver nga magmatngon pag-ayo.

Mao kini ang rason nga kon mo-travel mi og probinsya, ang akong mga sakop sa pamilya pulos makamao mo-drive, pero ako gyud ang mangunay sa pag-drive sa sakyanan.