Virus ang politika

Matud pa ni Senador Risa Hontiveros, nagpabilin siya’ng bukas sa mga tanyag kaniya alang sa padayon’g pagpangalagad sa katawhan.  Dugang pa sa senador, buot sa pundok sa opposisyon nga aduna sila’y “fighting chance” pinaagi sa pagtuboy og labing maayo’ng kandidato karon’g 2028 elections.  ‘Serbisyo publiko” kunohay ang nagdasig kang Hontiveros nga modagan pagka-presidente karong 2028.  Apan sama sa tanang politiko, kabantug, gahum ug bahandi lang ang tinuod nga tumong. Maglisod gyud sila pag-undang kay matud pa bitaw, “Virus ang politika kay bisan kadtong masakiton ug tigulang na, mapiskay ug mabaskog man panahon sa eleksyon.”  Muleeng!

Gidili ang pagpamutol

Gimando sa Energy Regulatory Commission (ERC) ngadto sa power utility companies nga suspensohon lang una ang pagpahigayon og disconnection sa mga konsumidor nga dili pa makabayad sa ilang electric bills gikan sa bulan sa Mayo 2026 ngadto sa Hulyo 2026 samtang gitugot usab ang 3-month payment installment.  Ikahinangop sa mga konsumidor kining maong kamanduan nga maisip nato nga usa ka sensible nga pamaagi paghatag alibyo sa kalisod sa katawhan. Sige na lang kon medyo awahi ang reaskyon sa ERC sa krisis kay giingon man usab nga “Better late than later.”  Mao maan!

Kurapsyon tungod sa kagubot

Segun sa report sa Anti-Red Tape Authority (ARTA), ang buhatan sa Land Transportation Office (LTO) ug sa Social Security System (SSS) nakadawat og labing daghan nga reklamo sa unang quarter sa 2026.  Sagad sa mga reklamo mao ang kalangan sa pagproseso sa mga application. Daghan ang transaksyon sa maong mga ahensya apan dili kini igong rason sa kalangan.  Pagmugna og tukmang sistema ang gikinahanglan aron mahatagan kini og sulbad. Makapahinumdum sa pahimangno sa usa ka opisyal sa Sugbo nga “Kon adunay kagubot ug kalibog, molipang usab ang kurapsiyon.”  Madahaan!

Double collection

Gipa-imbestigahan karon sa mga opisyales sa dakbayan sa Sugbo ang giingon nga “shadow economy” kabahin sa dugang nga bayronon sa mga vendors sa Carbon Market.  Gawas sa arkabala nga gikolekta sa dakbayan, mobayad pa gayod ang mga vendors sa gitawag nga “service charge” nga gikolekta sa mga kapunongan sa Carbon Market. Mas epektibo diay ang kapunongan kay sa kagamhanan sa pagdumala sa Carbon Market kay nakapangolekta man sila’g mas dako nga kantidad kay sa arkabala. Husto ang komento sa usa ka vendor nga, “Adunay double collection kay dili igo nga silot kon kausa ka lang pabayron sa pagbaton og negosyo sa Carbon.”  Fezteleern!

Daghan ang requirements

Nagtigom ang mga opisyal sa dakbayan sa Mandaue, kauban ang mga representante sa mga tulonghaan ingon mga benepisyaryo sa scholarship program sa tumong nga makaumol og mga plano nga maghimo sa maong programa nga episyente ug accessible sa mga tinun-an.  Kon tinud-anay ang katuyoan ug dili lang sagolan og politika, dali ra nga ma-simplify ang sistema sa scholarship program. Kay matud pa sa usa ka estudyante, “Lisod ang magpa-skolar kay mas dako pa ang mabayran sa mga requirements kay sa madawat nimo’ng allowance.”  Pagkatoytoy!