Krisis sa lana

Misaka na pod ang presyo sa produktong petrolyo karong adlawa mugna sa pagsaka sa presyo sa produktong petrolyo sa merkado sa kalibotan nga epekto usab sa gubat sa Amerika, Israel ug Iran.

Ang gubat sa tulo ka mga nasud nagmugna sa Pilipinas ulog kahigayonan nga makapatuyang sa ilang pagpanapi ang mga kompanya sa lana uban sa ilang pakigkombuya sa gobiyerno gamit ang Downstream Oil Deregulation Law nga salimbong sa ilang panapi.

Ang gubat nga gilusad sa Amerika ug Israel batok sa Iran naghatag og laing kahigayonan sa mga kompanya sa lana sa pagmugna og krisis sa lana alang sa ilang panapi.

Kun ang mga kompanya sa lana gitugotan sa gobiyerno nga makapasaka sa presyo sa ilang produktong petrolyo nga nakabasi lamang sa ispikulasyon unsa pa kaha ang gubat?

Bisan klaro kaayo ug tin-aw sa atong panan-aw ang taphaw ug bakikaw nga rason sa mga kompanya sa lana sa pagpasaka sa presyo sa ilang produktong petrolyo apan gipiyongan lamang kini sa mga mata sa gobyerno tungod kay kini kakunsabo.

Kinsa ba guy motuo nga ang pagsaka sa presyo sa produktong petrolyo nga gibaligya sa mga kompanya sa lana pagka ugma dayon mugna sa gilusad nga gubat sa Amerika ug Israel batok sa Iran?

Sa kalayo ning mga nasura sa Pilipinas miabot dayon ang gikompra nga lana pagka ugma dayon?

Gawas niini, wala magpalit ang mga kompanya og lana sa Pilipinas didto sa Iran, Israel ug Amerika.

Kanusa kaha ta undangi sa atong gobiyerno sa pagpalukapa?