EDITORYAL - Naay tulobagon ang mga barangay

Makasubo kaayo ang nahitabo sa usa ka 14 anyos nga batan-ong lalaki nga naligsan ug namatay diha sa Barrio Luz ning dakbayan sa Sugbu niadtong Miyerkules sa kaadlawon.

Ang batan-on kuyog sa mga amigo gikan nagduwa og basketball diha sa maong barangay. Wala hinuon matino kun liga ba gyud ni sa barangay o unsa apan giingong gikan kini nagduwa og basketball.

Padung na daw ni sila mamauli sa iyang lola sa Lahug, pero napunggit sa modern PUV diha duol sa gasolinahan sa may flyover sa Barangay Luz. 

Naligsan gyud ang lawas sa biktima ug gidala sa tambalanan apan namatay pagka-alas 6 sa gabii adlaw nga Miyerkules.

Karon ang mga netizens nagpangutana, nganong naa paman anang mga orasa ang batan-on nga unta naa may alas-10 sa gabii nga curfew?

Kung gikan sila nagduwa og basketball, gitugtan diay ang eskedyul sa duwa sa  mga minors  nga disoras na sa gabii?

Tingali kinahanglang susihon ni sa Association of Barangay Councils sa Cebu City. Kay dili ikalimod nga kada bakasyon o ba kaha kung nagsingabot ang ilang mga pista, naa gyuy mga liga.

Lain man pud kaayo og pulos lang hamtong ang paduwaon og mga liga, dapat apilon gyud ang mga menor de edad kaysa naman nga magbisyo nalang hinuon sila.

Kinahanglan tingaling ang mismong mga barangay motuman pud sa ilang curfew dili kay ilang bawugon ang ordinansa pabor sa ilang gusto o eskedyul unya mabutang sa peligro ang mga kabataan nga maoy giprotektahan sa gobiyerno.

Usa pa pud angay tingaling balikan og kumusta ang disiplina sa mga drayber sa mga pasaheroan ilabi na kadtong mobiyahe og dis-oras na sa gabii kay ang uban kung dili kuwang og tulog pa pahuway, nakagamit og illegal nga drugas o ba kaha nakainom.

Pagkakuyaw gyud ana nga dunay tawong nagdala og pila ka toneladang sakyanan nga dunay mga pasahero, unya magpaturagas og padagan diha sa kadalanan?