Dunay nikurog sa Senado

Klarong wala mahasol si Senador Alan Peter Cayetano sa pakisusi sa National Bureau of Investigation (NBI) sa P10 bilyones nga mga transaksiyon sa pag-host sa Pilipinas sa 2019 Southeast Asian Games (SEAG):

Gihasol niya ug sa iyang maguwang ang impeachment trial niadtong Miyerkules aron lang tawgon nga panghulga ang imbestigasyon ni NBI Director Melvin Matibag (nagtuo tingaling kublan sila isip senator judges); ug

Nag-Facebook live si Alan nga wala siyay problema kon imbestigahon ang SEAG basta imbestigahon sab ang flood scandal (mora og naa siya sa posisyon pagpahamtang og kundisyon).

* * *

Dili isulti sa mga Cayetano ang dili katabonan sa bungot ni Alan nga kaluspad tungod sa dili malalis nga kamatuoran: Kon dayunon sa NBI ang imbestigasyon (kon dili kini panungog lang ni Matibag), mao kini ang labing unang matinud-anon nga imbestigasyon sa SEAG, nga mas nailhan sa una nga kaldero scandal.

Walay nangahas sa pag-imbestigar ni Cayetano kaniadto kay giduphan siyang daan ni kanhi Presidente Rodrigo Duterte. Sama sa pagtabon ni Duterte nilang Michael Yang ug kaubanan sa mas dako nga Pharmally scandal sa pandemya sa Covid 19.

* * *

Wala maapil si Cayetano sa imbestigasyon sa Ombudsman ni Vince Dizon, iyang kaabag sa SEAG isip pangulo sa Bases Conversion Development Authority. Na-absuwelto si Dizon pero kadudahan ang kaligdong ni kanhi Ombudsman Samuel Martires, ang nagtago sa statements of assets, liabilities and net worth nilang Duterte ug kaubanan.

Imbestigahon ba sa NBI si Cayetano nga walay labot si Dizon (nga alyado na sa Marcos administration)? Bawos sa nahaunang pag-imbestigar ni Martires ni Dizon nga wala si Cayetano?

* * *

Mosamot nga dili kuyawan si Cayetano sa pahibawo ni Ombudsman Boying Remulla nga moapil ang iyang opisina pag-imbestigar sa posibleng mga anomaliya sa SEAG. Samtang nanagana pang Department of Justice pagpatubag ni Cayetano sa buto-buto sa Senado ug pag-eskapo ni Senador Bato dela Rosa, gilihok dayon sa Ombudsman ang kasong obstruction of justice batok niya.

Paspas nga napa-priso ni Remulla sa plunder si Senador Rodante Marcoleta tungod sa donasyon nga P75 milyones. Nga wala ra sa kumingking sa binilyon ka pesos nga gasto ni Cayetano (nga gikatahong walay bidding, walay appropriation ug walay liquidation) sa SEAG. Wala gyod tingali gikuyawan.

* * *

[email protected]