Balaod nga way ngipon

Pagka wa gyuy kapuslanan sa balaod nga nagmando nga irehistro na ang mga numero sa simpack sa cellphone aron kuno mailhan ang tag-iya kon gamiton kini sa illegal, sama sa scam, ug ilabi na sa mga bomb threats. Pero, hagiton gihapon nato ang kadagkoan sa PNP Anti-Cybercrime Group ug ang National Bureau of Investigation (NBI) nga himoon nila ang tanang paagi nga mailhan ang maghimo og binuang gamit ang cellphone. Tiaw mo, kaniadtong Martes sa buntag natugaw ang kalihoklan sa Talisay City government kay gipapauli ni Mayor Samsam Gullas ang mga kawani tungod sa bomb threat. Migamit og profile nga Mary Ann Pitogo ang nagpadala sa bomb threat ngadto kang Mayor Gullas, ug nagpahibawo nga ang tulo ka building sa Talisay City Hall gibutangan og bomba, ug matud pa mobuto kuno ni sa dili madugay. Nanagana lang si Mayor Samsam, kay basin sab tuod og tinuod. Pero ako nga nakadungog sa balita nga naglumbaanay sa pagpanggawas ang mga kawani ug mga tawo nga mo-transact unta og business sa City Hall, wa na motoo. Daghan na’ng higayon nga mga wa hiilhing tawo, magsige’g panghadlok, apan dili tinuod. Dunay usa nga naghimo’g bomb threat sa CTU dinhi sa Sugbo, nadakpan man gyud to, ambot og naunsa na. Unta, molihok pag-ayo ang kapolisan nga sakop sa PNP Anti-Cybercrime Group ug ang NBI aron madakpan ang naghimo niining labing ulahi nga bomb threat, ug matudloan siya’g leksyon.

Kay kon kanunay ra nga dili mailhan sa kapolian ug NBI ang maghimo sa bomb threat, makaagni kini sa uban nga mohimo sab, ug daghan ang masakripisyo.

* * *

Ang tinuod, gipasabot ko sa kadagkoan sa National Telecommunications Commission (NTC) nganong maglisud sila sa pag-ila kinsa ang tag-iya sa numero sa Simpack nga gigamit sa pagpanghulga. Wa ibutang sa balaod nga ang NTC makapugos sa mga Telecommunications Companies, sama sa Globe Telecom, PLDT, Sun Cellular, Smart, nga mohatag sa nga’n sa giisyohan nila’g Simpack. Gipasabot sa kadagkoan sa NTC nga kinahanglang usbon ang balaod, ug ibutang gyud nga kon mangayo ang NTC sa nga’n sa tawo nga giisyuhan nila og Simpak kay gihimo kini sa illegal, ihatag nila. Karon gud, kinahanglan pa nga ang kapolisan ug NBI moduso pa og petisyon sa korte nga mag-awhag nga mandoan nila ang telecomunications company nga mohatag sa nga’n sa tawo nga giisyuhan sa Simpack. Unta, dunay kongresista nga makahunahuna niini kay pagka karon way ngipon kining mao nga balaod. Irehistro kuno pero daw sa way kapuslanan!