Laglagan

Gipanghimakak ni kanhi House Speaker Martin Romualdez atol sa iyang direktang depensa sa kaugalingon sa mga pasangil nga siya ang utok sa budget insertion ug halapad nga pagpangawkaw sa salapi sa nasud.

Gipasabot ni Romualdez ang proseso sa pagpalabang sa nasudnong budget. Iyang gipasabot nga dili lang siya ug ang lehislatora ang may kamot sa proseso sa budget. Iyang giingon nga ang lehislatora kabahin lamang sa proseso sa budget.

Sa proseso sa budget ang ehekutibo ang mag andam niini pinaagi sa pagkolekta sa mga sugyot nga budget gikan sa tanang opisina ug departamento sa gobiyerno. Ang makolekta nga budget sumadahon ug ang sumada pagatawgon nga National Expenditure Program (NEP) nga isumitir ngadto sa  Ubos Balay Balauranan, dayon sa Senado alang sa pagpalabang sa General Appropriations Act (GAA) ang balaud nga magtugot sa pagpagawas sa pundo nga nakabotang sa NEP. Anaa pa ang Bicameral Committee nga maoy magsulbad sa nagsungi nga version nga provision gikan sa Ubos Balay Balauranan ug Senado.

Gipasanginlan ni Martin Romualdez sila si Kanhi Senate President Chiz Escudero ug kanhi House Appropriation Committee Chair Zaldy Co nga mao ang may kamot sa budget insertion.

Sakto si Kongresista Martin Romualdez sa iyang mga pagpasabot mahitungod sa proseso sa budget kay mao kini ang nakalatid sa libro. Ang problema lang, dili kini mao ang gipraktis sa mga kongresista ug senador apil na ang opisina sa Presidente. Mao man gani nga nakalusot ang usa ka gatos ka bilyon ka pesos nga gisalot sa 2025 nga nasudnong budget ug timan-i ninyo nga dili lang sa 2025 national budget nga may gihimo silang budget insertion, kay nagsalot pod diay sila sa 2023 ug 2024 nga national budget.

Kun imong sabton ang tunada sa istorya ni Escudero, si Romualdez ang utok sa kaguliyang sa budget. Kun si Romualdez pod ang imong pamation, sila si Escudero ug  Co ang utok sa budget insertion.

Pero kun si Co pod ang imong tuohan si Presidente Bongbong Marcos ug Martin Romualdez ang nagsugo sa budget insertion. Laglagan na.