Dautang hangin hulga sa kinabuhi

"Very Unhealthy" nga kalidad sa hangin sa Metro Cebu dili lang usa ka ordinaryo nga weather update. Kini usa ka seryosong pasidaan sa panglawas nga nagkinahanglan sa atong dinaliang pagtagad.

Sa dihang ang Air Quality Index (AQI) niabot sa makapaalarma nga 177 niadtong Martes sa buntag—human kini hapit motanday sa 199 sa miaging adlaw—wala na kita maghisgot lang og yano nga haze o gabon. Naghisgot na kita og usa ka delikado nga hulga sa kinabuhi.

Matud sa Environmental Management Bureau EMB nga nasagolan ang hangin og mga gagmay’ng particles gikan sa mga hugaw sa atong palibot nga naglakip sa emission sa mga sakyanan, aso sa mga sunog nga nahitabo ug ang init sa panahon nga nakamugna og abog nga nasagol sa hangin.

Ang nakaparat kay stagnant ang hangin nga bugtong ang uwan lang ang makapapas sa air pollutants.

Ang AQI level nga nakategorya isip "Very Unhealthy" nagpasabot nga ang hangin delikado na alang sa tanan.

Apan mas doble ang kakuyaw niini alang sa mga kaigsuonan nato nga adunay "talandogon" o mga sakit na daan—sama sa hubak (asthma), sakit sa baga, o sakit sa kasingkasing.

Busa dili kita angayan mokompiyansa ug mohimo kita og mga lakang nga nga mapanalipdan ang atong kaugalingon sa dautang epekto niini.

Dili nalang mogawas sa balay kong wala importanteng adtoon ug kong mogawas gyud magsul-ob gyud og N-95 mask mao ang labing maayo nga panalipod aron masala ang gagmay kaayong hugaw sa hangin.

Kon wala niini, ang basa nga panapton mahimong gamiton. Ang oras nga grabe ang concentration sa air pollutants ang alas 5 sa hapon hangtud na sa alas 6 sa hapon diin daghang mga sakyanan ang gabiyahe.

Mitingog na ang EMB ug ang lokal nga kagamhanan, apan nagpakahilom man ang Department of Health. Asa man sila karon nga gikinahanglan gyud unta ang ilang guidance sa mga angayan himoon o health protocol, aron dili magtag-an tag-an ang mga tawo sa mga ayangan nga buhaton.

Aktibo man unta sila kaniadto sa pagpagawas dayon og pahimangno sa mga tawo alang sa kinabuhi nga nabutang sa peligro niining panahona.

Wala man hinuoy problema kining mga taga DOH sa regional office in fairness nila.

Pero ang problema kay aduna may labaw nila didto sa kaulohan nga basin masuko kong mag atubang sila sa media kay matud pa nagpaabot pa sila og clearance ayha motubag sa mga pangutana sa media.

Maayo unta kong ipatigbabaw ninyo ang serbisyo alang sa katawhan nga inyong giserbisyohan.