Gilamian sa buhis
Walay klaro si Presidente Ferdinand Marcos Jr. Dihang niulbo ang gubat sa Iran ug nisulbong ang presyo sa mga produkto sa lana, nangayo siya sa Kongreso og gahom sa pagsuspenso sa excise tax sa gasolina, diesel, kerosene ug LPG.
Paspas nga nituman sa iyang awhag ang mga senador ug mga kongresista. Gikopya sa House of Representatives ang bersiyon sa Senado. Aron paglaktaw sa panginahanglan sa bicameral conference committee. Ug mas dali nga masumiter ang balaudnon ngadto sa Malakanyang aron mapirmahan dayon. Pero nikalit lang og kawala ang interes sa presidente.
* * *
Bisan nagpas-an nang mga konsumidor sa makalilisang nga uminto, wala mag-apura ang presidente:
• Wala siyay gihimo dihang nahimong epektibo ang balaod niadtong Abril 12;
• Abril 13 na niyang gipahibawo nga suspensuhon ang excise tax sa kerosene ug LPG, walay labot ang gasolina ug diesel;
• Abril 16 na niya gipirmahan ang executive order; ug
• Maabtan og laing pila ka adlaw una masuwat ang implementing rules and regulations ug maabtan og laing pila ka semana una hingpit mapatuman kay hutdon pa sa mga kompaniya sa lana ang karaan nilang imbentaryo.
* * *
Labing dako nga balitok sa presidente: Nituo sa iyang economic managers nga gipangulohan ni Executive Secretary Ralph Recto nga dili angayng suspensuhon ang excise tax sa gasolina ug diesel kay mga dato ra ang makapahimulos. Mas maayo nga padayong kolektahon aron kapun-an ang ayuda para sa labing apektado sa krisis.
Sukwahi sa ilang saad dihang giapura pang Kongreso pagtugot sa presidente pagsuspenso sa excise tax: Mapahimuslan sa tanang katawhan sa labing daling panahon, mas epektibo kay sa naandang ayuda.
* * *
Mas dakong eskandalo: Imbes luwason ang katawhan gikan sa value added tax (VAT) nga 12% sa kada litro sa oil products, nihukom sa pagpadayon sa pagpangolekta sa dili makiangayon nga kabilin pa sa karaang konsabo nilang Recto ug kanhi Presidente Gloria Macapagal-Arroyo.
Gilamian siya. Kay kada sulbong sa presyo sa lana, mosamot pagburot ang VAT nga ilang makolekta. Nakalimot siya nga dili negosyo ang gobiyerno. Nga moapil og pahimulos sa krisis sa lana. Imbes motuman sa ilang trabaho sa pagpanalipod sa kinabag-an sa katawhan. Nga maglisod na intawon pagpalit sa pagkaon ug ubang inadlaw nga mga panginahanglan.
* * *
- Latest
