Lisod puohon ang fixers

Pasaka-an sa Land Transportation Office (LTO) og kasong kriminal ug administratibo kadto’ng mga fixers nga nalambigit sa pagpalusot og ilegal nga lisensya ug dokumento sa ilang buhatan.  Mahinumduman nga mipahigayon ang NBI og entrapment operation sa LTO satellite office sa Quezon City diin nasikop ang 9 ka binuhat, duha niini mga empleyado mismo sa LTO. Lisod sumpo-on ang “fixers” diha sa LTO kay gawas nga dako kining pangwarta, daghan usab ang mi-patronize sa maong palusot.  Mao kana’y giingon nga, “Kining mga fixers sa LTO nahisama sa sagbot nga ‘cogon’ kay human sunogon, motubo gihapon pagbalik ug sa tumang kalabong.”  Fezteleern!

Multo o kalabera?

Gibutyag ni kanhi DPWH district engineer Henry Alcantara, atol sa pagdungog sa Sandiganbayan sa petition sa piyansa ni kanhi senador Bong Revilla, Jr., nga sa matag P100milyon nga flood control project sa iyang distrito sa Bulacan, P35 milyones lamang niini ang nagasto alang sa proyekto ug ang laing 30% maoy bahin sa kongresista nga proponent sa proyekto.  Gipakasama na lang gyud sa mga kawatan nga kaugalingon nila’ng kwarta ang gikan sa kagamhanan.  Tungod sa kurapsyon, duha ra kuno ang mahitabo sa mga flood control projects, “Kon dili mahimong multo (ghost), mahimo kining kalabera (skeleton).  Madahaan!

Salig apan ayaw’g laum

Mipasalig ang Department of Trade and Industry (DTI) nga walay mahitabong pagsaka sa presyo sa mga batakan ug nag-una’ng panginahanglan hangtud karong Mayo 10, 2026.  Abunda pa usab kuno ang suplay busa dili angay nga magpanic buying ang katawhan. Wala gani ipalit og bugas, mag-panic buying na ba hinoon?  Kon dili usab makontrolar sa gobyerno ang presyo sa gasolina, dili usab niini makontrolar ang presyo sa palaliton.  Mao kanay giingon sa akong apohan nga, “Kon mopasalig ang gobyerno nga dili mosaka ang presyo, nagpasabot kini nga padayon gihapon ang pag-umento.”  Muleeng!

Pag-intervene sa gobiyerno

Mipasaka sa Manila 3rd District Representative Joel Chua og balaodnon nga magsalikway na sa Oil Deregulation Law ug maghatag balik og gahum sa estado sa pag-intervene kon adunay pagsaka sa presyo sa lana sa kalibutanon’g merkado.  Panahon na nga ipasar ang maong balaodnon ug hinaut nga dili magpadala ang mga kongresista sa haylo sa kabulahanan nga posible’ng itanyag sa mga oil companies.  Matud pa sa akong higala, “Angayan undangon na ang pagpaka-aron ingnon sa kagamhanan nga kontrolado nila ang presyo sa lana kay sa tinuoray, matarantar man sila dayon kon mosaka na ang presyo niini bisan piso lang.”  Saoonz!

Maghinay Kon Magdali

Giduso ni Cebu City Mayor Nestor Archival ang pagrepaso ug pagpalig-on sa pagbansay sa mga barangay responders ug drayber sa mga emergency vehicle human sa nahitabo’ng panagbangga sa ambulansya ug motorsiklo, hinungdan sa kamatayon sa usa ka 18 anyos nga estudyante.   Mahimong aksidente lang ang panghitabo apan posible usab nga adunay habig nga nagkulang sa pagmatngon sa lagda sa trapiko.  Apan alang sa among silingan, dili na kinahanglan ang training sa mga driver, hinonoa, tamdan na lang ang pahimangno nga, “Kon gusto ka magdali, paghinay.”  Pagkatoytoy!