Wa gyud maleksiyon

Dunay tricycle nga gisakyan og pito ka tawo, apil ang driver, nadam-agan sa gikasugat niini nga delivery van didto sa national highway sa Sibonga, ug duha ang namaty ug lima nangaangol sa maong hitabo.

Ang tricycle driver maoy sad-an niadto kay ang tricycle wa gyud tuguti nga makadagan sa national highway. Gawas nga wa tugoti ang tricycle nga makadagan sa national highway, nagpataliwa pa gyud ug misugat sa pikas nga bahin sa karsada.

Klaro kaayo ang lagda nga gilatid sa LTO Memorandum Circular No. 94-199 nga “For safety reasons, no tricycle should operate on national highways utilized by 4-wheel vehicles greater than 4 tons and where normal speed exceeds 40 KPH.”

Buyno, ibutang nato nga kon wa gyuy laing alternate route, mahimong matugotan ang mga tricycle nga makabiyahe sa national highway, apan kinahanglang anha kini sa labing daplin sa karsada moagi, dili magpatunga.

Kaniadtong Sabado ug Domingo, mibisita ko sa akong farm sa southern Cebu ug wa gyud gihapon maleksiyon ang mga driver sa tricycle kay daghan ko og nakita nga anha gihapon sa tunga sa karsada moagi. Ignorante gyud sa balaod ang driver sa maong mga tricycle.

Unya, ang mga mayor sa maong mga lungsod wa sab magtagad nga unta makahimo man sila pagmando sa kapolisan nga badlongon ang maong mga driver nga magpatunga gyud sa karsada.

Mao gyud ni ang sagad nakong makita gikan sa Minglanilla, ngadto na sa Naga, San Fernando ug lahus na sa Carcar ug Sibonga. Mao nga kon dunay laing aksidente nga maglambigit og tricycle diha sa national highway, makaingon ko nga leksyon kini ngadto sa driver.

Mosabot kita nga panginabuhi sab sa mga tricycle driver ang pagpamasahero, apan anha sa daplin sa karsada agi, dili kay magpatunga kay para kana sa mga sakyanan nga kusog modagan.

Bisan sa ubang sakyanan nga four wheels, angay gyud nga magbaton og kaikog ang mga driver nga kon hinay ang imong pagpadagan, ayaw pagsubay sa tunga nga lane.

Unya, awhagon nako ang bag-ong regional director sa Land Transportation Office (LTO) dinhi sa Central Visayas nga sugoa ang imong mga sakop nga mopatrolya sab sila sa mga dapit sa probinsiya.

Apil nga akong hangyoon ang kadagkoan sa PNP Highway Patrol Group nga mohimo sab niini aron mapitol na kining mga driver nga badlongon kaayo.

Mga karsada two lanes unta paingon sa usa ka direksyon, apan dili magamit ang usa ka lane kay unsaon, giparkingan man ang daplin nga lane, gihimo man nga parking area sa mga sakyanan.