Ang hulga ni Trump ug ang PATI

Dili pa lang dugay nibuhi og bahad si Trump nga kun dili ma meet ang deal nga gitakda possible nga mapapas dili lang ang nasud kondili ang tibuok sibilisasyon. Hulga kini nga dili angayang pakagamyon. Hulga kini nga mahimong mahitabo o dili.

Depende sa hunahuna ni Trump. Apan atong hinumdoman nga niadtong Ikaduhang Gubat sa Kalibotan gihimo sa Estados Unidos ang paghulog og atomic bomb sa Nagasaki ug Hiroshima.

Ang maong hitabo maoy nakapaaghat sa nasud sa hapon nga mosurrender. Apan sa laing bahin kun kini mao ang tinguha ni Trump, mahimong sabton nato nga usa ka yawe sa dakong purohan nga mahimugso ang laing Gubat sa Kalibotan.

Daghang kadaut, daghang mga kinabuhi ang makalas. Husto ang giingon nga ang tawo maoy nihimo sa kalibutan nga usa ka impiyerno bisan pa man tuod kun kini usa ka Paraiso. Ang gikahadlokan sa kadaghanan mao man nga basin simbako mogamit sila sa Nuclear Weapon.  Butang nga makahatag og dakong kadaut dili lang sa mga kabtangan kondili usab sa kinabuhi sa kadaghanan.

Sa laing bahin, dinhi sa atong nasud nahimong sentro sa batikos ang parokya gumikan sa paggamit sa pati sa pagkuha sa belo sa Sugat.

Ang mga animal advocates daghan kaayong mga komentaryo niini. Ang uban makatarunganon samtang ang uban mahukmanon ra kaayo.

Mao nga kinahanglang mamahimong mabinantayon kita kalabot niini labina ning panahon sa Social Media.

 Mas maayo ra gyud nga dinhi sa among parokya among gi-simplify ug gihimong practical ang pamaagi sa Sugat. Unta ang atong pagpakabana sa kaayohan sa mga hayop susama pud unta sa atong pagpakabana sa kinabuhi sa tawo.

Usahay dagko og gasto ang tawo aron mohimo og pagduki duki kun mahimong kapuy-an ang planetang Mars apan pakyas kita sa paghatag og igong pagtagad sa kahimtang sa kinabuhi mismo sa atong planeta ug kanato nga nagpuyo dinhi.